भक्तपुर, २२ असार २०८१पूर्व प्रधानमन्त्री केपी शर्मा ओलीको निजी निवास बालकोटमा सुरक्षा प्रमुख रहेका सशस्त्र प्रहरी बलका प्रहरी निरीक्षक उमेश थापाको निधनले ओली दु:खी र स्तब्ध भएका छन् । सूर्यविनायक-७ गुण्डुस्थित आफ्नै घरमा गएराती सकुशल सुतेका थापाको असामाजिक निधनले पूर्व प्रधानमन्त्री ओलीलाई दु:खी र स्तब्ध बनाएको हो ।
थापा धेरै नबोल्ने र लजालु स्वभावका भएका पूर्व प्रधानमन्त्री ओलीले बताएका छन् । काममा जहिले पनि तम्तयार रहने गरेको स्मरण गर्दै उनी स्तब्ध भए ।
”सुरक्षामा खटिएका सशस्त्र प्रहरीका इन्स्पेक्टर भाइ उमेश थापाको निधनको खबरले दुःखी छु। आज म बाहिरका कुनै पनि कार्यक्रममा सहभागी भइनँ ।” उनले सामाजिक संजाल मार्फत आफू दु:खी भएको भनेका हुन् ।
“हिजो साँझ छुट्टिएर आफ्नै घर गएका उमेश भाइको बिहान निधनको खबर आयो। परिवारजनमा समवेदना व्यक्त गर्दछु ।” उनले लेखेका छन् ।
थापाको निधनले पूर्व मन्त्री एवं नेकपा (एमाले)का पोलिट्ब्युरो सदस्य महेश बस्नेत पनि मर्माहत भएका छन् । मृतक थापा नेता बस्नेतका छिमेकी पनि हुन् । एक असल छिमेकी र राम्रो युवा गुण्डुले गुमाउनु पुगेको प्रति उनले शोक ब्यक्त गरेका छन् ।
थापाको पार्थिव शरीरलाई शिक्षण अस्पतालमा पोस्टमार्टम पछि पशुपति स्थित आर्यघाट पुर्याई अन्तिम सस्कार समेत सम्पन्न गरिएको छ । आर्यघाट पुगी पूर्व मन्त्री महेश बस्नेत, सशस्त्र प्रहरी बलका महानिरीक्षक लगायतले अन्तिम श्रद्धाञ्जली अर्पण गरेका छन् ।
उमेश थापाको असामयिक निधनले सिङ्गो गुण्डु शोकाकुल बनेको युवा नेता दिनेश थापाले बताए । ह्दयघातका कारण उमेशको निधन भएको दिनेशले जानकारी दिए ।
पारिवारिक श्रोतले जनाए अनुसार मृतक उमेशमा मुटु रोग प्रमाणित नभए पनि केही महिना अघि छाती दुख्यो भन्दै गङ्गालाल ह्दयरोग केन्द्र पनि पुगेका थिए । मुटु रोग नरहेको र ग्यास्ट्रीक मात्र भएको भन्दै सम्बन्धीत चिकित्सकले आश्वस्त पारेपछि उनी ढुक्क भएका बताइएको छ ।
राती फुट्बल म्याच हेर्दा अरुलाई डिस्टर्ब नहोस् भनी उमेश एक्लै सुत्न गएका र बिहान ५:३० बजे परिवारले अचेत अवस्थामा उमेशलाई उपचारका लागि भक्तपुर अस्पताल पुर्याएका पारिवारिक श्रोतले जनाएको छ । अस्पतालले करिब पौने ७ बजे उनलाई मृत घोषित गरिदिएको थियो ।
मृतक उमेशका आमा बुवा, श्रीमती र १ छोरा छन् ।