![hanumante](https://bhaktapurpost.com/wp-content/themes/onlineparda/images/1px.gif)
भक्तपुरको हनुमन्ते खोलामा हाम फालेका मानिसको उद्धार गरिएको छ । स्थानीय र प्रहरीले उनको उद्धार गरेका हुन् ।
भक्तपुर-५ बाराहीस्थानको पुलबाट एक युवक हनुमन्ते खोलामा हाम फालेपछि उनलाई खोलाले बगाएको थियो । भक्तपुर-४ मंगलाछेंका ती २५ वर्षीय युवक मादक पदार्थ सेवन गरेको सुरमा खोलामा हाम फालेका थिए ।
उनलाई उद्धार गरी करिब साढे ८ बजे भक्तपुर अस्पताल पुर्याइएको थियो । अस्पताल श्रोतले उनको अवस्था खतरामुक्त रहेको जनाएको छ ।
हनुमन्तेको शीरमा वर्षा हुँदा शनिवार साँझदेखि भक्तपुरमा हनुमन्ते उर्लेको छ । हनुमानघाट, जगाती, च्यामासिंह र सूर्यविनायकको राममन्दिर र बाराहीस्थान आसपासका बस्तीमा पनि बाढी पसेको छ ।
भक्तपुरकी प्रमुख जिल्ला अधिकारी रोशनीकुमारी श्रेष्ठले रातिको समयमा पानीको सतह बढे अझ जोखिम हुनसक्ने भन्दै सबैलाई उच्च सतर्कताका लागि आव्हान गरेकी छन् ।
(व्यक्तिगत गोपनीयताका लागि युवकको नाम गोप्य राखिएको छ । : सम्पादक)