भक्तपुर, ८ साउन २०८१भक्तपुर-२ (क) सूर्यविनायक क्षेत्रबाट निर्वाचित प्रदेश सभा सदस्य किरण थापामगर र भक्तपुर-१ (क) चाँगुनारायण क्षेत्रबाट निर्वाचित प्रदेश सभा सदस्य सुरेश श्रेष्ठ बागमती प्रदेश सरकारमा मन्त्री बन्ने भएका छन् । सत्तारुढ गठबन्धनमा रहेको नेकपा (एमाले)का तर्फबाट थापामगर र नेपाली कांग्रेसका तर्फबाट श्रेष्ठ मन्त्री बन्ने भएका हुन् ।
बागमती प्रदेशसभामा नेपाली कांग्रेस संसदीय दलका नेता बहादुरसिंह लामाले आज मुख्यमन्त्रीमा दावी पेश गर्दैछन् । सोमबार नै दावी पेश गर्ने योजना भए पनि मन्त्रालयको भागबण्डा र नेकपा एमाले भित्रको आन्तरिक समस्याका कारण कार्यक्रम स्थगित भएको थियो।
नयाँ सहमति अनुसार बागमती प्रदेशमा कांग्रेसले मुख्यमन्त्रीसहित ७ र एमालेले ६ वटा मन्त्रालय पाउने भएका छन् । नेकपा एमाले बाट भक्तपुरका सांसद किरण थापामगरकै नेतृत्वमा सरकारमा जाने उच्च सम्भावना रहेको भक्तपुरपोष्ट श्रोतले जनाएको छ । यदि, नेतृत्व पाए भने थापामगर आर्थिक मामिला मन्त्री बन्नेछन् । त्यो पनि कांग्रेसले राखेमा भौतिक पूर्वाधार मन्त्रालय उनले पाउने छन् ।
त्यसो हुन नसके उनलाई रोजेको मन्त्रालय दिने तयारी रहेको छ । थापामगरले नेतृत्व गर्न नपाए स्वास्थ्य, खानेपानी वा, यातायात मन्त्रीमा चित्त बुझाउन बाध्य हुनुपर्ने भक्तपुरपोष्ट श्रोतले बताएको छ । एमालेले भक्तपुरका किरण थापा मगर, ललितपुरका प्रेमभक्त महर्जन, काठमाडौंका प्रकाश श्रेष्ठ, चितवनका अमन मास्के र सिन्धुलीकी सुकमाया तामाङलाई मन्त्री बनाउने बताइएको छ । पार्टी भित्र थापामगर अध्यक्ष केपी ओलीका बिश्वास पात्र हुन् ।
सत्तारुढ गठबन्धनमा रहेका भक्तपुरका २ सांसद मध्ये एमालेका थापामगरको मन्त्री पद सुनिश्चित रहेपनि कांग्रेसका श्रेष्ठलाई भने समाचार तयार पार्दा सम्म आश्वासन मात्र प्राप्त भएको छ । अघिल्लो पटक सोही क्षेत्रका सांसद कृष्णलाल भडेल भौतिक पूर्वाधार मन्त्री बन्न सफल भएकाले यस पटक श्रेष्ठ पनि उत्साहित नै छन् । तर पार्टीले उनलाई आश्वासन दिएपनि उनको मन्त्री पद सुनिश्चित भैसकेको छैन ।
संघीय सरकारमा भक्तपुर कांग्रेसका सभापति एवं सांसद दुर्लभ थापालाई मन्त्री पद नदिएको कारण प्रदेशमा श्रेष्ठलाई मन्त्री दिन पार्टी नेतृत्वलाई दबाब परेको श्रोत बताउँछ । भक्तपुर काँग्रेस श्रेष्ठलाई मन्त्री बनाउन लागिपरेकोले उनी मन्त्री बन्ने उच्च सम्भावना रहेको श्रोतको दावी छ । उनलाई सामाजिक विकास मन्त्रालय दिनेगरी छलफल अघि बढेको बताइएको छ । पार्टी भित्र श्रेष्ठ महामन्त्री गगन थापा निकट मानिन्छन ।
सोही प्यानलका कुन्दनराज काफ्ले पनि ससक्त दावेदार रहेकाले श्रेष्ठलाई मन्त्री बनाउन देउवा पक्षका जिल्ला सभापति दुर्लभ थापाको सक्रियता आवश्यक देखिन्छ । कांग्रेसबाट श्रेष्ठ संगै कुन्दनराज काफ्ले, श्याम बहादुर खड्का, विमल ठकुरी, मीनकृष्ण महर्जन, समिता खड्की, हरिप्रभा खड्की, सुना परियार, उर्मिला नेपाल र विनु रायमाझीलगायत मन्त्रीका आकांक्षी रहेका छन् ।