बुधवार बिहान त्रिभुवन बिमानस्थलमा भएको सौर्य एयरलाइन्सको जहाज दुर्घटनामा परी १८ जनाको ज्यान गएको छ । १९ जना सवार रहेको बिमानका क्याप्टेन मनिष रत्न शाक्यको भने उपचार भइरहेको छ ।

नागरिक उड्डयन प्राधिकरणले प्रेस बिज्ञप्तीमार्फत १८ जनाको मृत्यु भएको पुष्टि गरेको हो । मृतकहरु सौर्य एयरलाइन्सकै कर्मचारी रहेका बताइएको छ ।

सो दुर्घटना परी सूर्यविनायक नगर अस्पतालका निर्देशक प्राडा राकेशकुमार बर्माको भाइको पनि निधन भएको पारिवारिक श्रोतले बताएको छ । उनका भाइ दिलिप बर्माको दुर्घटनामा परी निधन भएको हो । दिलिप सौर्य एयरलाइन्सको क्वालिटी एस्विरेन्स प्रमुख रहेका बताइएको छ ।

त्यसैगरी को-पाइलट शुसान्त कटवाल व्यवस्थापनकै सागर कुमार आचार्य, अश्विन कुमार निरौला, यज्ञप्रसाद पौडेलले पनि दुर्घटनामा ज्यान गुमाएका छन् । अन्य कर्मचारीमा अमितमान महर्जन, मनुराज शर्मा, सुदिपलाल जोशी, सर्वेश मरासिनी, स्याम विन्दुकर, नवराज आले, राजाराम आचार्य,उद्धव पुरी, सन्तोष महतो, पुन्यरत्न शाही र आरिफ रेडा रहेका छन् । कर्मचारी मनुराजकी पत्नी प्रिजा खतिवडा र उनका ४ वर्षीय छोरा अधिराज शर्माले पनि दुर्घटनामा ज्यान गुमाएका छन् ।

मृत्यु भएको थाहा भएपनि शव चिन्ने अवस्था नभएको र मृतकको आफन्तले दिएको हुलिया, फिंगर प्रिन्ट लगायतका आधारमा पोस्टमार्टम  भैरहेको जानकारी प्राप्त भएको छ ।

पोस्टमार्टम गर्न भक्तपुर अस्पतालका चिकित्सक समेत खटिएका छन् । त्रिवि शिक्षण अस्पताल, पाटन स्वास्थ्य विज्ञान प्रतिष्ठान र भक्तपुर अस्पतालका चिकित्सक पोस्टमार्टम गर्न खटिएका हुन् ।

भक्तपुर जिल्ला प्रशासन कार्यालयका सूचना अधिकारी एवं सहायक सिडिओ डोरेन्द्रप्रसाद निरौलाले बिमान दुर्घटनामा भक्तपुरका कोहीपनि नपरेका भक्तपुर पोष्टलाई जानकारी गराएका छन् ।

इन्जिन मर्मतका लागि पोखरा लैजान लागिएको बिमान रनवे्बाट चिप्लिएर बिहान ११:११ बजे विमानस्थलको पूर्वी भागमा बजारिएको थियो । दुर्घटनाको कारण खुल्न सकेको छैन । बिमानका क्याप्टेन मनिष शाक्यको उपचारपछि दुर्घटनाको तथ्य बाहिर आउने बिश्वास गर्न सकिन्छ ।

सरकारले दुर्घटनाप्रति शोक व्यक्त गर्दै बिहीवार राष्ट्रिय झण्डा आधा झुकाउने निर्णय गरेको छ भने नेपाल नागरिक उड्डयन प्राधिकरणका पूर्व महानिर्देशक रतिशचन्द्रलाल सुमनको नेतृत्वमा ५ सदस्यीय जाँचबुझ आयोग पनि गठन गरेको छ ।