भक्तपुर, ११ साउन २०८१चाँगुनारायण सिटी एभोकाड़ो सिटी अभियान अन्तर्गत अभिन्ताहरुले चाँगुनारायण-८ सुडालमा विरुवा वितरण गरेका छन् । शुक्रवार साँझ सुडालको आरुवारी रञ्जितकार टोलमा एभोकाड़ोको विरुवा वितरण गरिएको हो ।
आरुवारी रञ्जितकार टोल विकास संस्थाले एभोकाड़ोको विरुवा माग गरेकाले सो क्षेत्रमा विरुवा वितरण कार्यक्रम सम्पन्न गरिएको चाँगुनारायण सिटी एभोकाड़ो सिटी अभियानका संयोजक नरेश खड्काले जनाएका छन् । आरुवारी रञ्जितकार टोलमा ४ सय विरुवा वितरण गरिएको सुडालका स्थानीय समेत रहेका अभियन्ता मदन श्रेष्ठले बताएका छन् । यस अघि असारमा सुडालकै सरस्वती स्थानमा पनि विरुवा वितरण गरिएको अभियन्ता श्रेष्ठले बताए ।
विरुवा वितरण कार्यक्रममा आरुवारी रञ्जितकार टोल विकास संस्थाका अध्यक्ष केशर श्रेष्ठले आफूहरुको माग बमोजिम विरुवा उपलब्ध गराएकोमा आभार प्रकट गरे । सामुहिक हितका लागि घामपानी नभनी अभियन्ताहरु हिडीरहेको देख्दा अभियान प्रति माया र श्रद्धा उत्पन्न भएको उनको भनाइ छ ।
अभियानका मूख्य अभियन्ता दिनेश खनालले चाँगुनारायणको सम्पदा र संस्कृतीलाई समेत जोडेर उपत्यका सम्पदा परिपथ निर्माणमा अभियानका परिकल्पनाकार डिपी ढकालले बागमती प्रदेश सरकारको मुख्यमन्त्रीका सल्लाहकार रहँदा योगदान गरेको स्मरण गर्दै चाँगुनारायण सिटी एभोकाड़ो सिटी अभियानले पनि चाँगुनारायणको पर्यावरण रक्षा र आय आर्जन वृद्धि गर्न मद्दत गर्ने दावी गरे ।
कार्यक्रमलाई सम्बोधन गर्दै चाँगुनारायण सिटी एभोकाड़ो सिटी अभियानका परिकल्पनाकार डिपी ढकालले आफूहरुको अभियान सबैको साझा अभियान भएको बताए । ‘एक घर, दुई एभोकाडो’ को उदेश्य सहित शुरु भएको आफूहरुको अभियानलाई सबैले सहयोग गरिरहेको प्रति उनले सन्तोष व्यक्त गरेका छन् । जुन दिन एभोकाड़ो फल्नेछ, त्यो दिन मात्र आफूहरुको अभियानले सार्थकता पाउने भन्दै उनले अभियन्ताहरुलाई निरन्तर सक्रिय रहन र समाजको हितका लागि लागिरहन प्रेरित पनि गरेका छन् ।
सो अवसरमा अभियन्ताहरु चण्डिका लामिछाने, नवराज काफ्ले, रामकुमार बुढाथोकी, सरराज उप्रेती, लक्ष्मण दुलाल, मदन ढुंगाना,अमृता संजेल, सोनिया ठकुरी, धर्म थिङ्ग, राजेश नेपाल, हरिशरण तिमल्सिना लगायतको उपस्थिति रहेको थियो ।
