भक्तपुर-२ (क) का बागमती प्रदेश सभा सदस्य समेत रहेका बागमती प्रदेश सरकारका नवनियुक्त स्वास्थ्य मन्त्री किरण थापाले स्वास्थ्यमा खेलोफ़ड्को गर्नेको गुञ्जायस नरहने उद्घोष गरेका छन् । शनिवार भक्तपुरको सूर्यविनायकमा आयोजित एक कार्यक्रममा उनले सो उद्घोष गरेका हुन् ।

केही अस्पतालमा कर्मचारी र बिचौलिया खेलोफ़ड्कोमा लागेका आफूलाई सूचना आएको खुलासा गर्दै मन्त्री थापाले आफ्नो कार्यकालमा उनीहरुलाई सचेत गराउनेदेखि कारवाही गर्नेसम्मको चेतावनी दिएका छन् ।

मन्त्री थापाले मन्त्री पद आफ्नो अन्तिम लक्ष नभएको र आफूलाई अझै बिशौं वर्ष राजनीतिमा रहनु पर्ने प्रष्ट पार्दै कुनै नराम्रो काम नगर्ने प्रतिवद्धता प्रकट गरे । ”मन्त्री भएर भक्तपुरको शीर झुक्न दिनेछैन, आफ्नो बुद्धिविवेक र क्षमताले भ्याएसम्म राम्रो काम गर्छु ।” उनले भने । मन्त्री भएर फर्कदाँ कुनै पनि दाग वा छिटा लाग्न नदिने उनको भनाइ छ ।

बागमती प्रदेशकै उत्कृष्ट घोषणा भएको भक्तपुर अस्पताललाई थप व्यवस्थित बनाउने र सूर्यविनायक नगर अस्पताललाई ट्रमा सेन्टरको रुपमा बिकास गर्ने उनले संकल्प प्रस्तुत गरेका छन् । त्यसैगरी भक्तपुरमा रहेका सरकारी र निजी गरी सत्रवटै अस्पतालको विकासमा आफ्नो कार्यकाल स्वर्णकाल हुने उनको दावी छ ।

मन्त्री थापाले संघीय सरकार मातहत रहेको भक्तपुर क्यान्सर अस्पताल र शहीद धर्मभक्त मानव अंग प्रत्यारोपण केन्द्रको स्थानान्तरण र भवन निर्माणमा पनि आफूले समन्वय गर्ने बताएका छन् ।

आफूले १३ वटै जिल्ला र त्यहाँका जनताको स्वास्थ सेवामा पहुँच वृद्धि गर्ने उनले बताए । भक्तपुरलाई अलिकति बढी माया त होला ! तर, नीतिगत रुपमा सबै जिल्लाप्रति आफू इमान्दार, उत्तरदायी र जवाफदेही भएर अघि बढ्ने उनले बिश्वास दिलाएका छन् ।

प्रदेशका सबै जिल्लास्थित प्रादेशिक अस्पताल र आयुर्वेद स्वास्थ्य केन्द्रप्रति आफूले उत्तिकै अभिभावकत्व प्रदान गर्ने उनले प्रष्ट पारेका छन् । ”सबै अस्पतालका मेसुलाई बोलाएर समस्या र सम्भावनाको खोजी गरि जतिसक्दो छिटो सुधारका कार्यहरु शुरु गर्छु ।” उनले भने ।