भक्तपुर, १७ साउन २०८१सत्तारुढ दल नेकपा(एमाले)ले पोलिटब्युरो सदस्य महेश बस्नेतलाई भक्तपुर जिल्ला इञ्चार्जको जिम्मेवारी दिएको छ । बिहीबार बसेको सचिवालय बैठकले जिम्मेवारी बाडफाड गर्दै पूर्व मन्त्री समेत रहेका बस्नेतलाई भक्तपुर जिल्ला इञ्चार्जको जिम्मेवारी दिएको हो ।
युवा संघको इञ्चार्ज रहेका नेता बस्नेतलाई अध्यक्ष केपी शर्मा ओलीको इण्टेरेस्टमा भक्तपुर इञ्चार्जको जिम्मेवारी थमाइएको एमाले श्रोतले जनाएको छ । यसअघि भक्तपुर जिल्ला इञ्चार्ज रहेका केन्द्रीय सदस्य सोमप्रसाद मिश्रलाई भने निर्वाचन क्षेत्र नम्बर १ को इञ्जार्जमा खुम्च्याइएको छ ।
भक्तपुरको नेतृत्व सर्वसम्मत गर्न निर्देशन दिएपनि चुनाव गरेपछि अध्यक्ष ओली भक्तपुरको नेतृत्वसंग असन्तुष्ट रहदै आएका थिए । भक्तपुरको पदाधिकारीमा अध्यक्ष ओली निकट उपाध्यक्ष र महिला उप सचिव मात्र निर्वाचित भएपछि उनको असन्तुष्टि बढेको बताइन्छ । माधव नेपाल पक्ष भनेर चिनिएका सोमप्रसाद मिश्र पार्टी विभाजनपछि एमालेमै रहेपनि अध्यक्ष ओलीको बिश्वास जित्न भने असफल भएका छन् । जिल्ला इञ्चार्जको जिम्मेवारीबाट निर्वाचन क्षेत्रमा खुम्च्याइएपछि सोकुरा सावित भएको छ । मिश्र चाँगुनारायण नगरपालिकाका संस्थापक मेयर समेत हुन् ।
त्यसैगरी, निर्वाचन क्षेत्र नम्बर २ को इञ्चार्जमा भने केन्द्रीय सदस्य निर्मल कुमार भट्टराईलाई जिम्मेवारी दिइएको छ । भट्टराई जिल्लामा महेश बस्नेतसंग नभएपनि केन्द्रमा अध्यक्ष ओलीकै क्याम्पमा छन् ।
खासगरी ओलीका सल्लाहकार समेत रहेका प्रभावशाली नेता बिष्णु रिमालसंग भट्टराईको निकटता रहेको बताइन्छ । उनी गरिबी निवारण कोषका पूर्व उपाध्यक्ष समेत हुन् ।
नेकपा(एमाले)को नवनिर्वाचित जिल्ला कार्यसमितिमा भने यी तीनै नेता बस्नेत, मिश्र र भट्टराईको बर्चश्व कम रहेको छ । तीनै नेताको प्यानलमा रहेका अध्यक्ष प्रत्यासी मोहनवीर श्रेष्ठलाई पराजित गर्दै बचन देउजा भक्तपुर जिल्ला अध्यक्ष निर्वाचित भएका छन् । यद्यपी, प्रभावका हिसाबले हेर्दा भने तीनैजना नेता प्रभावशाली मानिन्छन ।