बागमती प्रदेश सभाका सदस्य एवं नेकपा(माओवादी केन्द्र) का केन्द्रीय सदस्य देवेन्द्र श्रेष्ठ दिवाकरले आयुर्वेद तथा वैकल्पिक चिकित्सालय भक्तपुरका लागि जग्गा खोज्न सहयोग गर्ने प्रतिवद्धता प्रकट गरेका छन् । स्वास्थ्य उपचारका लागि कमलविनायक स्थित आयुर्वेद तथा वैकल्पिक चिकित्सालय पुगेका प्रदेश सांसद श्रेष्ठले सो प्रतिवद्धता प्रकट गरेका हुन् ।

चिकित्सालय प्रमुख रहेका डा नदन कँडेलले आफ्नै भवन नहुँदा सेवा बिस्तार गर्न समस्या भएको गुनासो गर्दै त्यसका लागि जग्गा व्यवस्थापनमा पहल गरिदिन सांसद श्रेष्ठसंग आग्रह गरेका थिए । ”भवन हामी आफैं बनाउछौं तर, हामीसंग जमिन भएन ।” उनले भने ।

यसअघि चाँगुनारायण नगरपालिकाको बागेश्वरीमा जग्गा उपलब्ध गराइने भनिएपनि प्रदेश स्वास्थ्य मन्त्रालयले त्यसलाई अस्वीकार गरेको डा कँडेलले अवगत गराए ।

अधिकत्तम बिरामीको लागि सहज पहुँच नपुग्ने भन्दै बागेश्वरीमा आयुर्वेद तथा वैकल्पिक चिकित्सालय बनाउन प्रदेश सरकारले अस्वीकृत गरेको हो । डा कँडेलले जिल्लावासीलाई पायक पर्ने ठाउँमा कम्तिमा ५ रोपनी जग्गा आफूहरुलाई आवश्यक रहेको जानकारी गराए ।

बागमती प्रदेश सरकारमा स्वास्थ्य मन्त्री समेत भक्तपुरकै रहेकाले  उपयुक्त स्थानमा आयुर्वेद तथा वैकल्पिक चिकित्सालय बन्ने प्रदेश सांसद श्रेष्ठले बिश्वास व्यक्त गरे ।

आफूले यसका लागि प्रदेश सरकार, स्थानीय सरकार र सरोकारवालासंग समन्वय गर्ने सांसद श्रेष्ठले बताए ।

सो अवसरमा उनले चिकित्सालयको दरवन्दी, भौतिक अवस्था र सेवाबारे जानकारी लिएका थिए भने डा कँडेलले चिकित्सालयको अवलोकन गराएका थिए ।

डा कँडेलले प्रदेश सांसद श्रेष्ठको स्वास्थ्य जाँच समेत गरेका छन् । उनलाई एक हप्ताको थेरापी र मसाज दिइने डा कँडेलले जानकारी दिए । प्रदेश सांसद श्रेष्ठको दाहिने हातको पाता दुख्ने र चलाउन नमिल्ने समस्या रहेको उनले जनाएका छन् ।