भक्तपुर, २५ साउन २०८१राष्ट्रिय स्वतन्त्र पार्टीले भक्तपुरमा ‘क्लोज क्याम्प’ सम्पन्न गरेको छ । बागमती प्रदेश स्तरीय २ दिने क्याम्प शुक्रवार सम्पन्न भएको हो ।
पार्टीको बागमती प्रदेश समितिले आयोजना गरेको सो ‘क्लोज क्याम्प’ विधान संशोधन सुझाव कार्यशाला भएको प्रदेश अध्यक्ष डा अच्युतम लामिछानेले बताएका छन् । सो कार्यशालामा बागमती प्रदेश अन्तर्गतका १३ वटै जिल्लाका जिल्ला सभापति र प्रदेश भित्र रहेका नगर सभापतिसहितका प्रतिनिधिहरु सहभागी रहेका अध्यक्ष लामिछानेले जानकारी गराए । कार्यशालामा करिब ३ सय प्रतिनिधि सहभागी रहेका थिए ।
रास्वपालाई राजनीतिक, वैचारिक एवं सांगठनिक रूपमा थप प्रभावकारी बनाउने उद्देश्यले विधान संशोधन गर्न लागिएको र त्यसका लागि भक्तपुरमा सम्पन्न कार्यशाला प्रभावकारी भएको विधान संशोधन कार्यदलकी सदस्य एवं प्रतिनिधि सभा सदस्य सोविता गौतमले जानकारी गराइन ।
‘क्लोज क्याम्प’ समापन सहारोहलाई शुक्रवार लिवालीमा सम्बोधन गर्दै रास्वपाका केन्द्रीय उपसभापति डिपी अर्यालले पार्टी सभापति रवि लामिछाने बिरुद्ध फ़ैलाइएका भ्रमहरुको प्रतिरोध गर्न निर्देशन दिए । सहकारीका बारेमा केहीपनि बुझ्दै नबुझेका र कुनै सहकारीको संचालक समेत नरहेका आफ्ना सभापतिले जीवनमै जम्मा २ वटा सहकारीमा खाता खोलेका भएपनि उनैलाई सहकारी ठग प्रमाणित गर्न खोजिनु पार्टी माथिकै प्रहार भएको उनको भनाइ छ ।
नेतृत्वबाट कमजोरी हुन सक्ने तर गलत काम नहुने जिकिर गर्दै पूर्व मन्त्री समेत रहेका उपसभापति अर्यालले नेतृत्वप्रति अविश्वास नगर्न आग्रह गरे । पार्टीले सरकारमा रहेर गरेका राम्रा कामहरुको प्रचार गर्न पनि उनले निर्देशन दिएका छन् । सो अवसरमा उनले प्रतिनिधिहरुले उठाएका बिबिध प्रश्नहरुको जवाफ दिएका थिए ।
कार्यशालापछि पत्रकारसंग कुराकानी गर्दै पूर्वमन्त्री समेत रहेका उपसभापति अर्यालले मिडियाले सकारात्मक संदेश प्रवाह नगरेको गुनासो गरे । आफ्नो पार्टीले देश र जनतामा सकारात्मक आशाको संचार गराएको जिकिर गर्दै उनले संचार माध्यमले त्यसलाई उचित स्थान नदिएको बताए ।
सुधार र सुशासनको पक्षमा रास्वपाले गरेका काम सहन नसकी सरकार ढालिएको बारे जनता जानकार रहेका र विरोधीले जति भ्रम फ़ैलाएपनि रास्वपा माथि जनताको बिश्वास अझ बढेको उनले जिकिर गरेका छन् ।