भक्तपुर, २७ साउन २०८१भक्तपुर-१ दुधपाटीस्थित सिद्धपोखरीसंगै व्यवस्थित पार्किङ्गस्थल बनेपछि आन्तरिक पर्यटक र अस्पतालका सेवाग्राहीले राहत पाएका छन् । भक्तपुर नगरपालिकाले दुधपाटीमा पार्किङ्गस्थलको व्यवस्था गरेपछि उनीहरुलाई राहत मिलेको हो ।
यस अघि सवारी साधनले छपक्कै हुने अस्पताल रोड यतिबेला सुनसान जस्तै देखिन्छ । यो सबै पार्किङ्गस्थलकै कारण सम्भव भएको स्थानीयले बताएका छन् । यस अघि सो क्षेत्रमा सडकमा मात्र नभई पेटीमा समेत मानिस नै हिड्न असहज हुनेगरी सवारी साधन पार्किङ्ग हुने गर्दथ्यो । पसल कवल छेक्नेगरी रोकिराख्ने सवारीसाधन पार्किङ्गस्थल प्रवेश गर्न थालेपछि स्थानीय व्यवसायी समेत सन्तुष्ट बनेका छन् ।
पार्किङ्गस्थलका कारण यो क्षेत्रमा ट्राफिक जामको समस्या टरेको भक्तपुर-१ का वडाध्यक्ष श्यामकृष्ण खत्री बताउँछन् । बिहान ६ बजेदेखि बेलुकी ७:३० बजे सम्म हेरालु राखी नगरपालिकाले पार्किङ्ग स्थलमा राखिएका सवारी साधनको सुरक्षा गरिरहेको उनले जानकारी गराए ।
पार्किङ्गको व्यवस्थाले जथाभावी पार्किङ्ग मात्र नियन्त्रण भएको छैन, सवारीसाधन पनि सुरक्षित भएका छन् । ”नगरपालिकाकै पार्किङ्ग भएपछि सवारी पार्क गरी निश्चिन्त भएर घन्टौं घुम्न पाइएको छ ।” भक्तपुर घुम्न आएकी श्वेता गुरुङ्गले भनिन ।
यो पार्किङ्गस्थलले विशेषगरी नजिकै रहेका ३ अस्पतालका सेवाग्राहीलाई समेत सजिलो भएको छ । साथै, अस्पतालले पनि पार्किङ्ग समस्या बाट राहत पाएका छन् । ”विशेषगरी घुम्नका लागि सवारी साधन अस्पताल परिसरमा पार्किङ्ग गर्ने प्रवित्ति रोकिएको छ भने कतिपय सेवाग्राही बाहिरै सवारी पार्किङ्ग गरी अस्पताल प्रवेश गर्दा भीड र कोलाहल कम भएको छ ।” भक्तपुर अस्पतालकी निर्देशक डा सुमित्रा गौतमले भनिन ।
दुधपाटीस्थित पार्किङ्गस्थलमा औषतमा दैनिक ३ सय वटा दुई पाङ्ग्रे सवारी र ५० वटा चार पाङ्ग्रे सवारी पार्किङ्ग हुँदै आएका छन् । यसवापत नगरपालिकाले प्रति सवारी दुई पाङ्ग्रेका लागि रु १० र चार पाङ्ग्रेका लागि रु २५ शुल्क लिंदै आएको छ । यसबाट नगरपालिकाले करिब २ लाख मासिक आम्दानी गर्नुका साथै रोजगारी सिर्जना गर्न समेत सफल भएको देखिन्छ । नगरपालिकाले दैनिक ज्यालादारीमा हेरालुहरु राखेर रोजगारी सिर्जना गरेको हो ।
मुख्य कुरा त के भने शुल्क लिएपछि नगरपालिकाले सवारीसाधन राख्न कुनै समय सीमा तोकेको छैन । आफ्नो काम नसकिएसम्म सोही शुल्कमा पार्किङ्ग गर्न पाइन्छ । न्यून शुल्कका कारण पनि प्रयोगकर्ताहरुको यस पार्किङ्गप्रति आकर्षण बढ्दै गएको देखिन्छ ।
भक्तपुर नगरपालिकाका प्रमुख सुनिल प्रजापतिले अव्यस्थित ट्राफिक व्यवस्थापन गर्न नगरपालिकाले ठाउँठाउँमा पार्किङ्गको प्रवन्ध मिलाएको जानकारी गराउँदै यसले सवारीसाधनको सुरक्षा र नगरको सुन्दरता बढाएको बताए । साथै, ट्राफिक जाम हटाउन र सडक दुर्घटना न्यूनीकरण गर्न समेत यसले सहयोग पुर्याएको उनले बिश्वास व्यक्त गरेका छन् ।
