मध्यपुर थिमि, ३० साउन २०८१मध्यपुर थिमि नगरपालिकाका उपप्रमुख विजय कृष्ण श्रेष्ठले युवा पुस्ता समाजसेवामा भन्दा सामाजिक संजालमा व्यस्त बनेकोप्रति चिन्ता व्यक्त गरेका छन् । युवा पुस्ताले समस्या मात्र देख्नु सट्टा सम्भावना र समाधान खोज्नुपर्ने एवं सकारात्मक बन्नुपर्ने युवा नेता समेत रहेका उपप्रमुख श्रेष्ठको सुझाव छ ।
मंगलवार नेपाल रेड्क्रस सोसाइटी मध्यपुर थिमि उपशाखाको २७ औं स्थापना दिवसका अवसरमा बोल्दै उपप्रमुख श्रेष्ठले रेडक्रस जस्ता संस्थाले युवा पुस्तामा मानवीय संवेदना र सेवाभाव जागृत गराई समाजसेवामा लाग्न प्रेरित गर्नुपर्ने प्रष्ट पारेका छन् । राजनीति समाजसेवाकै रुप भएको भन्दै उनले समाज सेवामा जोडिनु जनप्रतिनिधिको पहिलो दायित्व भएको र आफूहरूको जीवन समाजकै लागि सुम्पिएको जिकिर गरे ।
उपप्रमुख श्रेष्ठले शिक्षा र स्वास्थ्यको लागि यो वर्ष नगरपालिकाले १० करोड ५० लाख बढी बजेट बिनियोजन गरेको समेत बताए । उनले गुणस्तरीय शिक्षा र स्वास्थ्यमा स्थानीयको सहज पहुँच पुर्याउन नगर प्रतिवद्ध रहेको प्रष्ट पारे । नगरवासीले राम्रो शिक्षा र स्वास्थ्यको खोजीमा अन्यत्र भौतारिन नपर्ने उनको भनाइ छ ।
नगरपालिका अस्पतालमा अङ्ग प्रत्यारोपण सेवा थप्न लागेको खुलासा गर्दै उनले यसलाई नगरको मात्र नभई देशकै गुणस्तरीय अस्पतालको रुपमा बिकास गर्ने दावी गरेका छन् ।
बिकास निर्माणमा पनि प्रत्येक वडाको आवश्यकताको आधारमा काम भएको भन्दै उनले बाकी कामहरु यो वर्ष र आगामी वर्ष गर्दै जाने जानकारी गराए । सामाजिक विकास बिना अन्य भौतिक विकासको अर्थ नहुने भन्दै उनले गुणस्तरीय जीवनको लागि सामाजिक बिकासमा जोड दिइएको बताए । आफूहरुले निर्वाचनका बेला गरेको चुनावी प्रतिवद्धता अनुरुप काम गरिरहेको उनको जिकिर छ ।
नेपाल रेड्क्रस सोसाइटीलाई पनि आफ्नै भवन निर्माण गर्न नगरपालिकाले यो वर्ष ३० लाख छुट्याएको उनले जानकारी गराए । त्यस्तै, विपद ब्यवस्थापनमा पनि नगरपालिका दत्तचित्त भएर लागेको उनको भनाइ छ ।