भक्तपुर, ३१ साउन २०८१भक्तपुरको छ लेन सडक अन्तर्गत गठ्ठाघरमा बिभत्स दुर्घटना गराई फरार ट्रक चालक प्रहरी नियन्त्रणमा आएका छन् । उनी सर्लाहीको मलंगवा नगरपालिका वडा नं. २ का ३२ वर्षीय सतेन्द्र श्रेष्ठ हुन् ।
घटना लगत्तै फरार ट्रक चालक श्रेष्ठले काठमाडौं प्रहरीमा आत्मसमर्पण गरेका पाइएको र उनलाई मिनभवनबाट प्रहरी वृत्त थिमिमा ल्याइएको भक्तपुर प्रहरीको भनाइ छ ।
जिल्ला प्रहरी परिसर भक्तपुरका सूचना अधिकारी रहेका डिएसपी राजन कार्कीले ट्रक चालक पक्राउ परेका पुष्टि गरेका छन् । सुरक्षाको दृष्टिले दुर्घटना गराउने ट्रकलाई भने सशस्त्र प्रहरी गण नं. २ महाराजगन्ज काठमाडौं पुर्याइएको छ ।
काठमाडौंबाट आइरहेको बा४९प ८९४४ नम्बरको स्कुटीलाई सोही दिशाबाट आइरहेको ना६ख २१७३ नम्बरको मालबाहक ट्रकले गठ्ठाघर बस स्टपमा बिहीवार दिउँसो करिब २ बजेको समयमा ठक्कर दिएको थियो । ठक्कर दिएपछि पनि स्कुटी चालकलाई जानीजानी घिसारेर ज्यान लिएको भन्दै स्थानीय आक्रोशित छन् । ट्राफिक चेक पोइन्टका कारण दुर्घटना भएको आरोप लगाउदै ट्राफिक प्रहरी माथि स्थानीय खनिएका छन् । स्थानीयको प्रदर्शनका कारण सो क्षेत्र करिब ३ घण्टा तनावग्रस्त बनेको थियो ।
उक्त सवारी दुर्घटनाको विषयलाई लिई स्थानीय तथा सडकमा हिडेका मानिसहरुको भीडले विरोध प्रदर्शन गर्दा प्रहरीले बल प्रयोग गर्नुपरेको थियो । जिल्ला प्रहरी परिसर भक्तपुरका प्रमुख रहेका एसपी बेद बिष्टको कमाण्डमा १ सय १८ जनाको प्रहरी टोली स्थिति नियन्त्रणमा लिन खटिएका थिए । त्यसैगरी, काठमाडौंस्थित नेपाल प्रहरीका विभिन्न कार्यालयहरुबाट १ सय ३० जनाको थप टोली र सशस्त्र प्रहरीको १ सय २० जनाको प्रहरी टोली समेत घटनास्थलमा तैनाथ गरिएको थियो ।
२२ राउण्ड अश्रुग्यास हवाई फायर गरी भीडलाई तितरबितर पारेपछि मात्र मृतक स्कुटी चालकको शव ट्रकको चक्काबाट बाहिर निकाल्न प्रहरीलाई सफलता मिलेको थियो । भक्तपुरकी प्रमुख जिल्ला अधिकारी रोशनीकुमारी श्रेष्ठले संयमता अपनाउन र अनुसन्धानमा सहयोग गर्न सर्वसाधारणसंग आग्रह गरेकी थिइन् ।
स्कुटी चालकको शव पोस्टमार्टमका लागि महाराजगंज स्थित शिक्षण अस्पताल पुर्याइएको छ । मृतक व्यक्तिको भने पहिचान खुल्न सकेको छैन । भक्तपुरपोस्टसंग कुरा गर्दै भक्तपुरकी प्रमुख जिल्ला अधिकारी रोशनीकुमारी श्रेष्ठले अझै पनि मृतकको पहिचान खुल्न नसकेको बताएकी छन् । मृतकसंग पहिचान खुल्ने कुनै कागजात नभेटिएको उनले भक्तपुर पोस्टसंग भनिन् ।
मृतक सवार बा४९प ८९४४ नम्बरको स्कुटरको ब्लु बुक रेकर्डमा सवारी धनी ओखलढुंगाका उत्तम कोइराला देखिएकाले अहिले प्रहरी उनको सम्पर्कमा पुग्न तल्लीन रहेको छ । कोइरालाको मोबाइल नम्बर स्वीच्ड अफ आइरहेको छ । उनीसंग सम्पर्क भएपछि यकिन पहिचान प्राप्त गर्न सकिने अपेक्षा गरिएको छ । थप अनुसन्धान भैरहेको प्रहरीको भनाइ छ ।