भक्तपुर, ८ भदौ २०८१सिन्धुलीको सुनकोसीमा इसुजु जीप खस्दा चालक भक्तपुरका अविन बकेसहित उनका दुई साथीहरु बेपत्ता भएका छन् । एकजना भने पौडेर बाहिर निस्कन सफल भएका छन् ।
सिन्धुलीका सहायक सिडिओ एवं सूचना अधिकारी कृष्णमणि फुयाँलले चालक भक्तपुरकै भएका पुष्टि गरेका हुन् । उनले भक्तपुर पोष्टलाई दिएको जानकारी अनुसार चालक सूर्यविनायक- ४ का अविन बके रहेको पुष्टि भएको छ ।
बके आफ्ना ३ साथीहरु सहित खोटाङको हलेसी मन्दिर दर्शन गरेर फर्किने क्रममा साँझ सुनकोशीमा खसेका थिए ।
गोलञ्जर गाउँपालिका- १ कुडुलेमा जीप खस्दा चालक बकेसहित प्रनित सायँजू र बलराम घटुब बेपत्ता भएका छन् भने सुशान्त कक्षपति पौडिएर निस्किएका सहायक सिडिओ फुयाँलले जानकारी दिए । उनलाई उपचारका लागि खुर्कोट पठाइएको बताइएको छ ।
समाचार तयार पार्दा सम्म बेपत्ताहरु फेला परेका छैनन । जीप फेला परेको र सशस्त्रका गोताखोरहरुले नदी बाहिर ल्याउन प्रयास गरिरहेका सहायक सिडिओ फुयाँलले जनाएका छन् । फुयाँल घटनास्थलमै रहेका छन् । उनले चालक बकेका परिवार सम्पर्कमा आएका समेत जानकारी गराए । बेपत्ताहरुको खोजी कार्य जारी रहेको सहायक सिडिओ फुयाँलले जनाएका छन् ।
सच्याइएको : जीपको ब्राण्डनाम अन्यथा भएकोले सच्याइएको छ ।