फाइल तस्वीर

भक्तपुर नगरपालिका-१ स्थित सल्लाघारी-दुधपाटी सडक छेउमा ढल्ने सम्भावना भएका रुख कटान शुरु भएको छ । डिभिजन वन कार्यालय सानोथिमि, भक्तपुरले ढल्ने सम्भावना भएका रुख काट्न शुरु गरेको हो ।

सल्लाघारीदेखि सैनिक स्कूल सम्म सडक छेउमा रहेका केही रुखहरु जिर्ण भएका देखिएकोले सरकारी प्रक्रिया पूरा गरी ती रुखहरु काट्न शुरु गरिएको भक्तपुरकी प्रमुख जिल्ला अधिकारी रोशनीकुमारी श्रेष्ठले जनाएकी हुन् । कुनैपनि बेला ढलेर जनधनको क्षती हुन सक्ने जोखिम बढेकाले जोखिमयुक्त रुख काट्न शुरु गरिएको उनले बताईन् ।

”जनप्रतिनिधि, स्थानीय र सरोकारवालाको गुनासो आएपछि डिभिजन वन कार्यालयलाई अनुगमनका लागि आग्रह गरिएको र सोका आधारमा काट्नुपर्ने भनी किटान भएका ढल्केका, जरा कमजोर भएका जोखिमयुक्त रुख प्रकृति प्रतिकूल नहुने गरी काट्न शुरु गरेका हौं,” उनले भनिन ।

भक्तपुर-१ का वडाध्यक्ष श्यामकृष्ण खत्रीले सो क्षेत्रमा दुई वर्ष अघि रुख ढली जनधनको क्षती भएकोले जिल्ला प्रशासन कार्यालय र डिभिजन वन कार्यालयलाई अनुगमनका लागि आग्रह गरिएको जानकारी गराए । सो अनुसार जोखिमयुक्त रुख काट्न शुरु गरिएको प्रति उनले सन्तोष व्यक्त गरेका छन् ।

डिभिजन वन कार्यालय सानोथिमिको सूचना अधिकारी सलिना कडालले सो क्षेत्रमा २ दर्जन सल्लाका रुख काट्नुपर्ने देखिएको जानकारी दिइन् । मुचुल्का उठाई रुखहरु काट्न थालिएको उनको भनाइ छ । रुख कटान र व्यवस्थापन डिभिजन वन कार्यालय सानोथिमिले गरिरहेको वन अधिकृत विनिता पाण्डेले बताएकी छन् ।

दुई वर्ष अघि २०७९ साउन ७ गते चोङ्गा गणेश क्षेत्रको रुख ढलेर गुडीरहेको बस र स्कुटर च्यापिदा तीन जनाको ज्यान जानुका साथै १ दर्जन मानिस घाईते भएका थिए । त्यतिबेला पनि दुर्घटना दोहरिन नदिन सो क्षेत्रको सडक वरपरका जोखिमयुक्त रुखहरु काटिएको थियो ।