मध्यपुर थिमि, १२ भदौ २०८१ भक्तपुरका पुराना कम्युनिष्ट नेता कृष्ण बाग श्रेष्ठको निधन भएको छ । मध्यपुर थिमि निवासी श्रेष्ठको ८२ वर्षको उमेरमा निधन भएको हो ।
उनी लामो समयदेखि सुगर प्रेसर लगायतका रोगले ग्रसित रहेका थिए भने दुई वर्ष यता प्यारालाइसिसका कारण हिडडुल गर्न समेत सक्दैनथे । बुधवार बिहान मध्यपुर अस्पतालमा उनको निधन भएको हो ।
श्रेष्ठका ५ छोरा र ४ छोरी छन् ।
कम्युनिष्ट पार्टीको सदस्य भए पश्चात मोटो मसाल हुँदै माओवादी भएका नेता कृष्ण बाग श्रेष्ठ शहिद बैकुण्ठहरी श्रेष्ठका समकालीन हुन् । उनले परिवर्तन, क्रान्ति र न्यायको पक्षमा सतिसाल झैँ उभिएका कम्युनिष्ट नेताको परिचय बनाएका छन् । मध्यपुर थिमिमा उनी क्रान्तिप्रिय नेताको रुपमा चिनिन्छन ।
बुधवार बिहान दक्षिण बाराहीस्थित घाटमा उनको अन्त्येष्टि गरिएको छ । त्यस अघि उनलाई नेकपा (माओवादी केन्द्र)का तर्फबाट कम्युनिष्ट पार्टीको झण्डा ओडाएर जिल्ला इन्चार्ज दिलिप प्रजापति भिष्मले अन्तिम सम्मान प्रदान गरेका थिए । उनलाई अन्तिम श्रद्धान्जली दिन माओवादी केन्द्रका केन्द्रीय सदस्यहरु देवेन्द्र श्रेष्ठ दिवाकर, डिपी ढकाल, जिल्ला अध्यक्ष सुनिल बासु र सचिव जीवन तज लगायतका नेताहरु दक्षिण बाराही पुगेका थिए ।
माओवादी केन्द्रका नेताहरु मात्र होइन, नेकपा क्रान्तिकारी माओवादीका नेता सिपी गजुरेल, पवनमान श्रेष्ठ र जिल्ला अध्यक्ष श्री कृष्ण सुलु त्यसैगरी विप्लव नेतृत्वको नेकपाका नेता कुशल बोगटी लगायतका नेताहरु पनि श्रेष्ठलाई श्रद्धान्जली अर्पण गर्न उपस्थित थिए ।
उनीहरुले नेता श्रेष्ठको निधनले कम्युनिष्ट आन्दोलनलाई अपूर्णनीय क्षती भएको भन्दै उनले देखाएको बाटोमा हिड्नु नै उनीप्रतिको सच्चा श्रद्धान्जली हुने बताएका छन् ।