बागमती प्रदेश सरकारले नि:शुल्क सीपमुलक तालीम दिने भएको छ । बागमती प्रदेश सरकार मातहत रहेको सामाजिक विकास कार्यालयले नि:शुल्क सीपमुलक तालीम दिने भएको हो ।

उपत्यकामा ३ जिल्ला हेर्ने सामाजिक विकास कार्यालयका कार्यालय प्रमुख नवराज नेपालले भक्तपुर, ललितपुर र काठमाडौंमा छुट्टाछुट्टै विषयका तालीम संचालन हुने जानकारी गराएका छन् । भक्तपुरको मध्यपुर थिमि-४ स्थित बालप्रेमी माविमा केश शृंगार तथा सौन्दर्य कलासम्बन्धी तालीम संचालन हुने उनले जानकारी दिए । त्यस्तै, काठमाडौंको डिल्लीबजारस्थित पद्मकन्या विद्याश्रम माविमा सिलाई कटाईसम्बन्धी तालीम संचालन र ललितपुरको गोदावरी-९ छम्पीस्थित वडा कार्यालयमा बेत/बाँसको हस्तकला सम्बन्धी तालीम संचालन हुने कार्यालय प्रमुख नेपालको भनाइ छ ।

” १६ वर्ष देखि ४० वर्ष सम्मका युवाहरुलाई यी तालीम नि:शुल्क उपलब्ध गराइन्छ ।” उनले भने । तालीममा सहभागीलाई खाजा खर्च पनि दिईने उनले जनकारी दिएका छन् । तालीमका लागि बिपन्न,पछाडि परेका वर्ग/समुदाय, शहिद परिवार, घाइते, अपाङ्गता भएका र एकल महिलालाई प्राथमिकता दिइने बताइएको छ ।

तालीम लिन इच्छुक व्यक्तिले असोज ११ गते भित्र दरखास्त दिनुपर्ने व्यवस्था गरिएको छ । सामाजिक विकास कार्यालय वा सम्बन्धीत तालीम केन्द्रमा दरखास्त लिने र बुझाउने व्यवस्था गरिएको उनले बताए । आवेदकको अन्तर्वार्ताबाट प्रशिक्षार्थी छनौट गरिने कार्यालय प्रमुख नवराज नेपालले जनाएका छन् ।