भक्तपुर, ३ असोज २०८१भक्तपुरमा सक्रिय दुई ग्रुप निलम्बनमा परेका छन् । सामाजिक सञ्जाल फेसबुकले ती दुई ग्रुपलाई निलम्बनमा राखेको हो ।
भक्तपुरमा लोकप्रिय रहेका हाम्रो भक्तपुर सवल भक्तपुर र भक्तपुरियन्स ग्रुप एकसाथ निलम्बनमा परेका हुन् । बुधवारबाट यसका सदस्यले ग्रुप भेटाउन सकेका छैनन् । हाम्रो भक्तपुर सवल भक्तपुरमा ३९ हजार ४ सय सदस्य छन् भने भक्तपुरियन्स ग्रुपमा १ लाख १८ हजार २ सय सदस्य संख्या रहेको छ ।
फेसबुक ग्रुप किन सस्पेन्ड गरियो भन्ने बारे फेसबुकले सदस्यहरुलाई केही बताएको छैन । फेसबुकले कम्युनिटी स्ट्याण्डर्डमा कडाई गर्दायस्तो समस्या आएको आइटीका ज्ञाता न्हुज किजु बताउछन् । ग्रुप एडमिन रहेका किजुले जनाए अनुसार ग्रुपमा बिभिन्न कम्पनीका लागि कर्मचारी आवश्यकता सम्बन्धी शब्दलाई स्क्याम र ठगी ठान्ने नयाँ नियम अनुसार यी दुई ग्रुप पनि निलम्बनमा परेका हुन् ।
धेरै मानिसले फेसबुकको कम्युनिटी स्ट्याण्डर्ड उल्लङ्घन गरिएको उजुरी गरिरहँदा पनि फेसबुकले त्यस्ता अकाउन्ट,पेज र ग्रुपलाई निलम्बन गर्ने गर्दछ । फेसबुकले एआइ डिटेक्टरको सहायताले सामाजिक सञ्जाल अनुगमन गरिरहेको हुन्छ । शंका लाग्नासाथ उसले सचेत गराउने, निलम्बन गर्ने र बन्देज लगाउने सम्म गर्दछ ।