संविधान सभा सदस्य रामनारायण बिडारीले माओवादी जनयुद्धकै कारण वर्तमान संविधान बनेको र संघीय लोकतान्त्रिक गणतन्त्र सम्भव भएको भनेका छन् । नेपाली काँग्रेस र नेकपा(एमाले)लगायतका दलहरु पुरानै संविधानको सिरानी हालेर सुतिरहेका बेलामा माओवादीले वर्तमान संविधानको लागि बलिदानी गरेको उनले बताएका हुन् ।

संविधान दिवसका अवसरमा अखिल (क्रान्तिकारी) सानोठिमी क्याम्पस समितिले आयोजना गरेको अन्तरक्रिया कार्यक्रमलाई बिहीवार सम्बोधन गर्दै संविधानका एक मस्यौदाकार समेत रहेका बिडारीले माओवादी जनयुद्धलाई हत्या हिँसा भन्नेहरुले संविधानको मर्म नबुझेका बताए । वर्तमान संविधान बनाउन संविधान सभाको माग गर्दा हजारौ मानिसलाई तत्कालीन राज्य पक्षले हत्या गरेको, बेपत्ता बनाएको, जेलनेल र अंगभंग गराएको इतिहास युवा पुस्ताले बुझ्नुपर्ने पनि उनको भनाइ छ ।

नेकपा(माओवादी केन्द्र)का केन्द्रीय सदस्य बिडारीले वर्तमान संविधान समाजवादी संविधान नभएको पनि प्रष्ट पारेका छन् । समाजवाद उन्मुख संविधान भन्ने वाक्यांशका लागि पनि अन्य दलहरुलाई सहमती गराउन निकै कसरत गर्नुपरेको उनले खुलासा गरेका छन् । समाजवादको बाटो पहिल्याउन यसले मद्दत गर्ने उनले बिश्वास व्यक्त गरे ।

उनले वर्तमान संविधानमा मौलिक हकको पर्याप्त व्यवस्था भएको उल्लेख गरेका छन् । ३१ वटा मौलिक हक उल्लेख भएको संसारकै उन्नत संविधान नेपालको संविधान भएको उनले दावी गरेका छन् । त्यस्तै समावेशी र समानुपातिक व्यवस्थाले दलित, महिला, सिमान्तकृत एवं पछाडि पारिएका वर्ग र क्षेत्रका हक अधिकार सुनिश्चित भएको उनको दावी छ । उनले भारत र अमेरिकाको भन्दा नेपालको संविधान राम्रो भएको बताएका छन् । संविधान कार्यान्वयनको पक्षमा जोड दिदै उनले यसलाई अक्षरश: लागू गर्न सके गाँसबास, कपास, शिक्षा, स्वास्थ्य, रोजगारी र सम्वृद्धि लगायतको ग्यारेन्टी गरिएको उनको जिकिर छ।

”संविधान सभाले बनाएको पहिलो र अघिल्ला ७ संविधानको तुलनामा यो सर्वोत्कृष्ट संविधान हो ।” उनले भने । तर, यसैमा सन्तुष्ट हुने अवस्था भने नभएको उनको तर्क छ ।

अहिले संविधान संशोधनको बहस चलिरहँदा आफूहरु संशोधनको बिरोधी नभएको उनले बताए । ”पुरानैमा फर्काउन होइन, अग्रगमनका लागि संविधान संशोधन आवश्यक छ । उनले भने । नेता बिडारीले राजनीतिक शौदाबाजीका लागि नभई देशको हितलाई केन्द्रमा राखी संविधान संशोधन गर्नपर्ने बताएका छन् ।

सो अवसरमा नेकपा (माओवादी केन्द्र) का केन्द्रीय सदस्य डिपी ढकालले वर्तमान संविधान सहमतीको दस्तावेज भएकोले आफूहरुले चाहे जस्तो समाजवादी संविधान नबनेको बताए । यद्यपी अन्य यथास्थितिबादी दलहरुलाई लतार्दै समाजबाद उन्मुख संविधान बनाउनु सन्तोषजनक भएको उनको भनाइ छ ।

नेता ढकालले दलहरुमा केन्द्रीकृत मानसिकता रहेकाले प्रदेश र स्थानीय सरकारलाई अधिकार सम्पन्न गराउन थप प्रयासको आवश्यकता औल्याए । ”हात खुट्टा बाधेर पोखरीमा पठाए जस्तोसुकै पौडीबाज पनि पौडिन सक्दैन, अहिले प्रदेशहरुको अवस्था पनि त्यस्तै छ । ” उनले भने ।

संघीयताले खर्च बढाएको भ्रम फ़ैलाइएको भन्दै उनले तत्कालीन विकास क्षेत्र,अञ्चल, जिविस र गाविसहरुको तुलनामा झन् कम प्रशासनीक खर्च भैरहेको तथ्य प्रस्तुत गरेका छन् । बिकास बजेट खर्च गर्नेमा संघ र स्थानीय भन्दा प्रदेश सरकार पहिलो भएको भन्दै उनले संघीयताले बिकासको बाढी ल्याएको बताए ।

विकास, सेवा बिस्तार र उपलब्धीका हिसाव किताब प्रस्तुत गर्दै उनले संघीय लोकतान्त्रिक गणतन्त्रमा देशले प्रगती गरिरहेको प्रष्ट पारे । तथ्यलाई तोडमोड गर्ने संघीयता विरोधीहरुको प्रतिकार गर्नुपर्ने उनको भनाइ छ ।

अखिल (क्रान्तिकारी) सानोठिमी क्याम्पस समितिकी अध्यक्ष चन्द्रकला बास्तोलाको अध्यक्षतामा सम्पन्न सो कार्यक्रममा सानोठिमी क्याम्पसका प्राध्यापक विष्णु पौडेल र सुजन सोडारी, स्ववियु सभापति रेशमलाल श्रेष्ठ, अखिल (क्रान्तिकारी) का केन्द्रीय नेताहरु रमेश खड्का, प्रकास केसी,मास बहादुर लामा, अन्जित तामाङ्ग त्यसैगरी वाइसिएल भक्तपुरका अध्यक्ष सरराज उप्रेतीको समेत आतिथ्यता रहेको थियो ।