भक्तपुर, ५ असोज २०८१सूर्यविनायक-५ सल्लाघारीमा गठन गरिएको हाली ग्ह्वाली समूहलाई सधैं साथ दिने प्रतिनिधि सभा सदस्य दुर्लभ थापाले प्रतिवद्धता प्रकट गरेका छन् । एकतामै बल हुने भन्दै उनले समूहको गठनप्रति खुशी प्रकट गर्दै सो प्रतिवद्धता प्रकट गरेका हुन् ।
शनिबार साँझ नपलीस्थित नौनी घ्यू रेस्टुरेन्टमा सम्पन्न हाली ग्ह्वाली समूह र सांसद थापाबीचको अन्तरक्रियामा बोल्दै उनले आफूले दिनमा मात्र नभई राती सपनामा पनि जनताकै सेवा गरिरहेको देख्नेगरेको खुलासा गरे । जनप्रतिनिधि शासक नभई सेवक भएको भन्दै उनले जुनसुकै समयमा आफू जनसेवाको लागि तम्तयार रहेको बताए ।
सल्लाघारीबासी हुनुका नाताले पनि एवं आफ्नै अग्रज र साथीहरू सम्मिलित समूह हाली ग्ह्वाली गठन हुँदा आफू उत्साहित भएको उनको भनाइ छ । यसले आपसी भातृत्व बढाउने मात्र नभई सो क्षेत्रको पूर्वाधार बिकास, सार्वजनिक निर्माण, सरसफाइ , सामाजिक सेवा र आर्थिक विकासमा पनि योगदान गर्ने उनले बिश्वास ब्यक्त गरेका छन् ।” तपाईंहरु अघि बढ्नुस, म सदैव साथमै हुनेछु ।” उनले भने ।
हाली ग्ह्वाली समूहका अध्यक्ष राजेशमान मानन्धरको अध्यक्षतामा सम्पन्न सो कार्यक्रममा सल्लाघारीको ट्राफिक लाइट ब्यवस्थापन देखि तरकारी बजार ब्यवस्थापन, खानीपानीको समस्या समाधान र सार्वजनिकस्थलको सरसफाइ लगायतमा समूहले कार्य अघि बढाउने निष्कर्ष निकालिएको सचिव प्रविन्द्र बज्राचार्यले बताए ।
गत वर्ष चैतमा गठन भएको हाली ग्ह्वाली समूहको उपाध्यक्षमा बद्री नागा रहेका छन् भने कोषाध्यक्षको जिम्मेवारी बिष्णु भक्त सिन्तकलाले पाएका छन् । समूहमा २५ परिवार सामेल रहेको कार्यसमितिका सदस्य श्यामभाइ मानन्धरले बताएका छन् ।
सो समूहमा हाल सल्लाघारी क्षेत्रमा बसोबास गर्ने नेवा: समुदाय संगठित भएका बताइएको छ ।