भक्तपुर, १२ असोज २०८१पहिरोले घर पुरिँदा भक्तपुरको सूर्यविनायक-८ का दुई दिदीबहिनी बेपत्ता भएका छन् । अविरल वर्षाका कारण पहिरो गई घर पुरिँदा उनीहरु बेपत्ता भएका हुन् ।
बेपत्ता हुनेमा सूर्यविनायक-८ आशापुरी, नैचालका करिब ४५ वर्षिया सुकुमाया(मसली) तामाङ्ग र उनकी बहिनी रहेका वडासदस्य बिक्रम तामाङ्गले बताएका छन् । घटना शनिवार बिहान करिब ७ बजे भएको उनको भनाइ छ । आफ्नो घरमा पहिरो जाने खतरा भएपछि बहिनी दिदीको घरमा आश्रय लिन पुगेकी थिइन् । परिवारमा रहेका सुकुमायाका पति र छोरा भने भागेर बाहिर निस्कन सफल भएका बताइएको छ । ”उहाँहरुलाई पनि जस्ताले काटेर घाइते हुनुहुन्छ, अस्पताल पुर्याउन सकिएको छैन ।” वडा सदस्य विक्रमले भने ।
वडा सदस्य बिक्रम तामाङ्गले घटना लगत्तै प्रहरीलाई खबर गरेको बताएका छन् । ठाउँ ठाउँमा पहिरो गएकाले उद्धारमा पुग्न नसकिएको उनको भनाइ छ । जिल्ला प्रहरी वृत्त जगातीकी डिएसपी दिप्ती कार्कीले भने घटनास्थलमा प्रहरी पठाई सकिएको बताएकी छन् ।
दर्जनौं ठाउँमा पहिरो गएको र अझै अविरल पानी परिरहेकोले घटनास्थलमा पुग्न सकिने अवस्था नरहेको स्थानीय सरोज लामा बताउँछन् । शुक्रवार बाट नै बिजुली गएकाले मोबाइलमा चार्ज नहुँदा सम्पर्कमा समेत समस्या भएको उनले बताए ।