भक्तपुरको सूर्यविनायक-९ पलाँसे, मगरगाउँमा पहिरोमा परी ३ जनाको ज्यान गएको छ । शनिबार बिहान करिब साढे ८ बजेको  समयमा पहिरोले उनीहरू बस्दै आएको टहरा पुरिएपछि ज्यान गएको हो ।

ज्यान गुमाउनेमा कालिकोटको सानी त्रिवेणी गाउँपालिका-५ घर भै  पलासे मगरगाउँ बस्ने २४ वर्षीया दमिला शाही, उनको ४ वर्षीया छोरी प्रिया र उनकी १४ वर्षीया बहिनी मनिसा शाही रहेका छन् ।

दमिला गर्भवती थिइन् । उनको ज्यान गएसंगै उनको पेटमा रहेको ९ महिने शिशुले पनि यो संसार देख्न पाएनन् । घर मुली रहेका दमिलाका श्रीमान् २७ वर्षीय गणेश बम भने बाच्न सफल भएका छन् । उनी दुध लिन बाहिर गएको बेला पहिरोले टहरा पुरिएको जिल्ला प्रहरी बृत्त जगातीकी डिएसपी दिप्ती कार्कीले जानकारी दिइन् ।

सशस्त्र प्रहरी बल नेपाल नम्बर २२ गण दुवाकोटबाट खटिएको सप्रनि भुपाल बिक्रम शाहको कमान्डमा रहेको टोलीले शव बाहिर निकालेको हो ।

उनीहरूको शवलाई पोस्ट मार्टमका लागि दुवाकोट स्थित केएमसी अस्पताल पठाइने प्रमुख जिल्ला अधिकारी रोशनीकुमारी श्रेष्ठले बताएकी छन् । प्रकोपको जोखिम कायमै रहेकोले उच्च सतर्कता अपनाउन पनि उनले सबैलाई आग्रह गरेकी छन् ।