भक्तपुर, १६ असोज २०८०भक्तपुरको दोश्रो जेठो विद्यालय विद्यार्थी निकेतनबाट एसईईमा सर्वोत्कृष्ट नतिजा ल्याउने विद्यार्थीलाई विशेष सम्मान गरिएको छ । ३.८२ जिपिए ल्याउने सुस्मिता चौलागाईंलाई विशेष सम्मान गरिएको हो ।
बुधबार भक्तपुर दरवार क्षेत्रको साकोथास्थित विद्यालय प्राङ्गणमा आयोजित कार्यक्रमकाबीच चौलागाईंलाई सर्वोत्कृष्ट नतिजाका लागि विशेष सम्मान गरिएको थियो । चौलागाईं कक्षा ११ मा पनि सोही विद्यालयमा भर्ना भइ अध्ययनरत छिन् । कार्यक्रममा एसईई उत्तीर्ण अन्य विद्यार्थी पनि सम्मानित भएका थिए ।
सो समारोहलाई सम्बोधन गर्दै प्रमुख अतिथि रहेका बागमती प्रदेश सभा सदस्य सुरेन्द्रराज गोसाइँले विद्यार्थी निकेतनले आफ्नो पुरानो शैक्षिक बिरासत फर्काउने बिश्वास ब्यक्त गरे । “नयाँ नेतृत्व र सक्षम समूहका कारण विद्यार्थी निकेतन अघि बढ्दैछ ।” उनले भने ।
स्थापनाको ६ दशक भन्दा लामो समयदेखि शिक्षाको ज्योति छर्दैरहेको विद्यार्थी निकेतनसंग अन्य विद्यालयबीच प्रतिस्पर्धा गर्दै अघि बढ्नुको बिकल्प नभएको उनले बताए । शिक्षकले विद्यार्थीलाई आफ्नै सन्तान झै माया गर्नसके जुनसुकै विद्यालयको पनि प्रगति हुने उनको भनाइ छ ।
त्यसैगरी विब्यसका अध्यक्ष तथा भक्तपुर-५ का वडाध्यक्ष योगेन्द्रमान बिजुक्छेंले विद्यार्थी निकेतन पुरानो इतिहास बोकेको विद्यालय भएको भन्दै यसलाई विद्यार्थी र अभिभावकको पहिलो रोजाइ बनाउनपर्ने आवश्यकता औल्याए । यसका लागि स्थानीय सरकारको सधै साथ र सहयोग रहने उनले प्रतिवद्धता पनि प्रकट गरेका छन् ।
विद्यालयका प्रधानाध्यापक न्हुछेबहादुर खाताखोको अध्यक्षतामा सम्पन्न सो कार्यक्रममा अतिरिक्त क्रियाकलापमा उत्कृष्ट विद्यार्थीहरुलाई पुरस्कार प्रदान गरिएको थियो । सो अवसरमा विद्यार्थीहरुले आफ्ना विविध प्रतिभा पनि प्रस्तुत गरेका थिए । कार्यक्रममा सहभागिहरुले एक आपसमा दशैको शुभकामना समेत साटासाट गरे ।
