भक्तपुर, २१ असोज २०८१बागमती प्रदेश सरकारका स्वास्थ्य मन्त्री किरण थापाले प्रदेश सरकार मातहतको स्वास्थ्य मन्त्रालयमा प्राविधिक सचिव हुनुपर्ने आवश्यकता औल्याएका छन् । प्रशासनका सचिवले मन्त्रालयको आवश्यकता पुरा नहुने बताउँदै उनले प्राविधिक सचिव हुनुपर्ने आवश्यकता औल्याएका हुन् ।
गृह जिल्ला भक्तपुरका पत्रकारसंग सोमबार कुराकानी गर्दै मन्त्री थापाले भने, ”स्वास्थ्य मन्त्रालय प्राविधिक मन्त्रालय भएकोले यसको प्रभावकारी कार्यसम्पादनमा प्राविधिक सचिव आवश्यक छ ।” सो अवसरमा मन्त्री थापाले संघीयतामा प्रदेश सरकार बलियो हुनुको बिकल्प नभएको बताउदै कर्मचारीतन्त्र जागिरे मानसिकताबाट मुक्त नहुँदा जनतामा प्रदेश सरकारप्रति असन्तुष्टि रहेको गुनासो गरे ।
”प्रदेशको स्वास्थ्य क्षेत्रमा संघीय सरकारको उपस्थिति न्यून छ ।” उनले भने, ”प्रदेशको प्रभावकारीता देखाउन प्रदेश सरकार मातहतका अस्पतालले अधिकतम सेवा प्रवाह गर्नुपर्दछ ।” उनले प्रदेश सरकारप्रति अपनत्व बढाउँन प्रदेश मातहतका कर्मचारीले आफ्नो जिम्मेवारी इमान्दारीसाथ पूरा गर्नुपर्ने प्रष्ट पारे ।
मन्त्री थापाले प्रदेशका १३ वटै जिल्लामा प्रादेशिक अस्पताल रहेको उल्लेख गर्दै ती अस्पतालमा मुख्यमन्त्री जनता कार्यक्रम मार्फत नसर्ने रोगको नि: शुल्क परीक्षण हुने जानकारी दिए । गरीव तथा असहाय र जेष्ठ नागरिकका लागि प्रदेश मातहतको अस्पतालमा निशुल्क उपचार सेवा उपलब्ध गराइएको बताउँदै मन्त्री थापाले भक्तपुर अस्पताल उपत्यकामै प्रदेशको नमूना अस्पतालको रुपमा बिकास भैरहेको पनि बताए । ” भक्तपुर अस्पताललाई ३ सय सैयामा बिस्तार गर्ने प्रदेश सरकारले निर्णय गरिसकेको छ ।” उनले भने ।
स्वास्थ्य मन्त्री थापाले बागमती प्रदेशलाई स्वास्थ्यको क्षेत्रमा नमूना प्रदेश बनाउने जिकिर गर्दै सोका लागि अल्पकालीन र दीर्घकालीन लक्ष निर्धारण गरिएको समेत जाकारी दिए । ”म मन्त्री रहुँला या नरहुँला, बागमती प्रदेश सरकारको स्वास्थ्य मन्त्रालयलाई सही ट्राक दिन्छु ।” उनले दावी गरे ।
सूर्यविनायक नगर क्षेत्रका प्रदेश सांसद समेत रहेका मन्त्री थापाले गत साता पहिरोमा परी सूर्यविनायक नगरमा ५ जनाले ज्यान गुमाएको र प्रदेशमा सयौं नागरिकले ज्यान गुमाउनुपरेको प्रति दु:ख व्यक्त गरे । उनले मृतक परिवारलाई तत्काल प्रदेश सरकारले २ लाख राहत दिएको र घाइतेको निशुल्क उपचार गरिरहेको पनि जानकारी गराए । बाढी पहिरोले सबैभन्दा बढी क्षती काभ्रेमा गरेको बताउँदै उनले आफूले आज मेथिनकोट अस्पतालको निरीक्षण गरी फर्किएको र बाढीपहिरो पिडित परिवारको मर्म अनुरुप अस्पतालका मेडिकल सुपरिण्टेण्डेण्टलाई आवस्यक निर्देशन दिएको बताए ।
”भक्तपुरको एउटा सांसद मन्त्री हुँदा स्वास्थ्य क्षेत्रमा धेरै राम्रो काम भएको थियो भन्ने मानक बनाउँछु ।” उनले भने । आफ्नो राजनीतिक यात्रा लामो भएको भन्दै उनले आफ्नो कामले भक्तपुरबासीको शिर उचों बनाउने बताए । ”मेरो कार्यकालमा प्रदेशकै स्वास्थ्य क्षेत्रमा प्रगती त हुन्छ नै भक्तपुरले समेत सदियौं सम्झन लायक काम गर्छु ।” उनले ठोकुवा गरे ।