भक्तपुर, २४ असोज २०८१प्रतिनिधि सभा सदस्य दुर्लभ थापाले सहायता फाउन्डेसन जस्ता संस्थाका कारण सामाजमा सेवाभाव जिउँदो रहेको बताएका छन् । ब्यक्तिगत स्वार्थ प्रेरित समाजमा सहायता फाउन्डेसन जस्ता संस्थाले पुर्याएको योगदानको स्मरण गर्दै उनले सोकुरा बताएका हुन् ।
बिहीबार सूर्यविनायक-५ कटुन्जेमा आयोजित शुभकामना आदानप्रदान कार्यक्रमलाई सम्बोधन गर्दै सांसद थापाले सहि कर्मले मात्र मान्छेलाई सहि ठाँउमा पुर्याउने पनि बताए । समाजमा नकारात्मक मानिस पनि हुने र उनीहरूले सहि मानिसलाई रोक्न खोज्ने भन्दै उनले त्यस्ता मानिसको ब्यवहारबाट सच्चा मानिसहरू बिचलित बन्नु नहुने बताए ।
“सत्य र न्यायको सधैं जित हुने शिक्षा हामीलाई बडा दसैंले दिएको छ, सहायता फाउन्डेसन पनि सत्य र न्यायको सिद्धान्तमा रहुन्जेल कुरा काट्नेहरु आफैं पाखा लागेर जान्छन् ।” उनले भने ।
सहायता फाउन्डेसनले असक्त र जेष्ठ नागरिकका लागि सृजनानगर र कटुन्जेको दुरीमा नि: शुल्क इरिक्सा सेवा दिएको एक वर्ष पुगेको प्रति उनले संतोष समेत व्यक्त गरेका छन् । गत वर्ष इरिक्सा उद्घाटन गरेको स्मरण गर्दै सांसद थापाले भने, ‘स्थानीय सरकारले गर्न नसकेको काम हाम्रा समाजसेवीले गर्न सक्नु गौरवको कुरा हो ।”
सहायता फाउन्डेसनले बालबालिकाको लागि प्रत्येक शनिवार मौलिक संस्कार सिकाउने कक्षा समेत संचालन गरेको प्रति उनले प्रसंशा गरे । “बालबालिकालाई संस्कारी र अनुशासित बनाई मुलुकको जिम्मेवार नागरिक बनाउन फाउन्डेसनले महत्वपूर्ण कार्य गरेको छ ।” उनले भने ।
शिक्षा,स्वास्थ्य, सरसफाइ, संस्कृति र जेष्ठ नागरिकको पक्षमा सहायता फाउन्डेसनले पुर्याएको योगदानको उच्च प्रसंशा गर्दै सांसद थापाले सहायता फाउन्डेसनलाई सहायता गर्न आफू सदैव प्रतिवद्ध रहेको पनि प्रष्ट पारेका छन् ।
सो अवसरमा फाउण्डेसनका सल्लाहकार एवं गीतकार सुभाष चन्द्र ढुङ्गेल र राष्ट्रका लागि दुई घण्टा अभियानका अध्यक्ष मधु ढुङ्गेलको पनि आतिथ्यता रहेको थियो । ढुङ्गेलद्वयले समाज सेवाको महत्वमाथि प्रकाश पार्दै सहायता फाउन्डेसनको सेवाकर्म थप उचाईमा पुग्ने बिश्वास ब्यक्त गरेका थिए ।
कार्यक्रममा बिनोद ढुङ्गेल र नकुल अच्छामीले गीत प्रस्तुत गरेका थिए । सहायता फाउण्डरेशनका अध्यक्ष राजु ढुङ्गेलको सभापतित्वमा शुशिला भैरव प्रागंणमा सम्पन्न सो कार्यक्रममा स्थानीयको उल्लेख्य उपस्थिति रहेको स्थानीय एवं वरिष्ठ पत्रकार रमेश खड्काले बताए ।