भक्तपुर, २६ असोज २०८१भक्तपुरका सडकमा रहेका सहयोगापेक्षीलाई मिष्ठान्न भोजन प्रदान गरिएको छ । विजयादशमीको अवसरमा शनिवार सडकमा रहेका सहयोगापेक्षीहरुलाई मिष्ठान्न भोजन प्रदान गरिएको हो ।
विजयादशमीको पावन दिनमा कोही भोकै नरहुन् भन्ने ध्येयका साथ भोजन सेवाको कार्यक्रम सञ्चालन गरिएको कार्यक्रम संयोजक समाजसेवी नवराज काफ्लेले बताएका छन् ।
सो अवसरमा सडकको आश्रयमा रहेका एक सय बढी मानिसलाई भोजन गराइएको उनको भनाइ छ । भक्तपुरका ४ नगर मध्ये सबैभन्दा बढी सडक मानव मध्यपुर थिमि नगरभित्र भेटिएका उनले जानकारी दिए ।
जिल्ला प्रहरी परिसर भक्तपुरबाट खटाईएको प्रतिनिधिबाट सडकमा रहेका सहयोगापेक्षीको पहिचान गरिएको समाजसेवी काफ्लेले जानकारी गराएका छन् । कतिपयको त परिवारै सडकमा पाइएको छ । नगरपालिकाले बनाएका पाटीहरुलाई उनीहरुले आफ्नो आश्रयस्थल बनाउदै मजदुरी, फोहर संकलन र माग्ने कार्यगरी जिविका चलाएका देखिन्छ ।
भोजन सेवा कार्यक्रममा वागमती प्रदेश सरकारका स्वास्थ्य मन्त्री किरण थापामगर, प्रदेश सभा सदस्य सुरेश श्रेष्ठ, चागुनारायण नगरपालिका-२ का वडाध्यक्ष सोमप्रसाद प्रधान र राष्ट्रको लागि दुई घण्टा अभियानका उपाध्यक्ष नरेश रन्जित लगायतको उपस्थिति रहेको थियो ।
कार्यक्रममा आधा दर्जन संघसंस्थाले सहयोग गरेका थिए ।
