भक्तपुर, २ कार्तिक २०८१के तपाईले आफ्ना बालबालिकालाई ‘भिटामिन ए’ क्याप्सुल र जुकाको औषधी ख्वाउनुभयो ? कात्तिक २ र ३ गते देशभरका बालबालिकाहरुलाई भिटामिन ए क्याप्सुल र जुकाको औषधी खुवाउने कार्यक्रम छ ।
सो कार्यक्रम अन्तर्गत शुक्रवार भक्तपुरका बालबालिकालाई पनि भिटामिन ए क्याप्सुल र जुकाको औषधी खुवाइएको छ । शनिवार पनि दिनभर सो कार्यक्रम संचालन हुनेछ ।
स्वास्थ्य कार्यालय भक्तपुरका निमित्त प्रमुख शान्तिराम खतिवडाका अनुसार ६ महिना देखि ५ वर्ष मुनिका बालबालिकाहरुलाई भिटामिन ए र १ वर्ष देखि ५ वर्ष मुनिका बालबालिकालाई जुकाको औषधी खुवाउने कार्यक्रम भैरहेको छ । उनले शुक्रवार छुटेका बालबालिकालाई शनिवार भिटामिन ए क्याप्सुल र जुकाको औषधी खुवाउने जानकारी दिएका छन् ।
देशभर २१ लाख बालबालिकालाई भिटामिन ए खुवाईदै छ भने जुकाको औषधी खाने बालबालिकाको संख्या १९ लाख रहेको छ ।
सरकारले हरेक वर्ष वैशाख ६ र ७ तथा कात्तिक २ र ३ गते यसैगरी भिटामिन ए र जुकाको औषधी खुवाउने कार्यक्रम सञ्चालन गर्ने गर्दछ ।
बालबच्चामा भिटामिन ‘ए’ को कमी भएमा अन्धोपन, छाला रोगको समस्या, शारीरिक तथा मानसिक विकासमा कमी, दाँत र हड्डीको विकासमा कमी, कुपोषण र बाल मृत्युदरको उच्च जोखिम रहने स्वास्थ्यकर्मीहरु बताउँछन् ।