सत्तारुढ दल नेकपा(एमाले) को सूर्यविनायक नगर कमिटीले शनिवार अधिवेशन गर्ने भएको छ । एमालेले नंखेलस्थित सेराटन पार्टी प्यालेसलाई अधिवेशनस्थल बनाएको छ ।

अधिवेशनका लागि सबै वडाको अधिवेशन सम्पन्न गरिसकिएको नगर अध्यक्ष रविन्द्र सापकोटाले बताएका छन् । बुधवार पत्रकार सम्मेलन गर्दै अध्यक्ष सापकोटाले केन्द्रीय महासचिव शंकर पोखरेलको प्रमुख आतिथ्यतामा अधिवेशन उद्घाटन गर्ने तयारी रहेको पनि जानकारी गराए ।

नगर अध्यक्ष सापकोटाले जनाए अनुसार सूर्यविनायकमा एमालेका ३ हजार ४ सय २७ संगठित पार्टी सदस्य रहेका छन् । बन्द सत्रमा सहभागी हुन प्रत्येक वडाबाट वडागत रुपमा २५ सदस्य बराबर १ प्रतिनिधि र दलित/उत्पीडित तर्फ १० सदस्य बराबर १ प्रतिनिधि गरी १० वटा वडाबाट कूल १ सय ४५ प्रतिनिधि चयन गरिएका छन् । त्यसैगरी आयोजक समितिका ७१ जना, पार्टीका ११ वटा जनवर्गीय संगठनबाट ११ जना, बिधान बमोजिम ५ प्रतिसत महिला छान्दा ११ जना गरी कुल २ सय ३८ जना महाधिवेशन प्रतिनिधि रहने छन् ।

अधिवेशनले नयाँ नेतृत्व चयन गर्ने समेत पत्रकार सम्मेलनमा जानकारी गराइएको छ । जिल्ला अधिवेशनमा देखिएको गुटगत प्यानल नगर अधिवेशनमा नहुने एमालेको जिकिर छ ।

जिल्ला अध्यक्ष बचन देउजाले ४ नम्बर र ९ नम्बर वडामा मात्र निर्वाचनबाट नेतृत्व चयन गरिएको जानकारी गराउदै बाकी सबै वडामा सर्वसम्मत नेतृत्व चयन भएको बताएका छन् ।”जिल्ला अधिवेशनपछि एमालेमा गुटगत अराजकता हुन्छ भन्नेहरुलाई वडा अधिवेशनले राम्रो संदेश दिएको छ ।” उनले भने ।

पार्टीमा हुने आन्तरिक प्रतिस्पर्धाले पार्टीलाई जीवन दिने तर अराजकतालाई पार्टीले छुट नदिने उनले स्पष्ट पारेका छन् । शनिवार हुने अधिवेशनले सर्वसम्मतरुपले नेतृत्व चयन गर्ने अध्यक्ष देउजाले दावी गरेका छन ।

सो अवसरमा एमाले भक्तपुर जिल्ला इन्चार्ज महेश बस्नेतले केही वर्ष अघि सम्म जिल्लामा कमजोर स्थितिमा रहेको नेकपा(एमाले) अहिले प्रमुख शक्तिका रुपमा रहेको जिकिर गरे । यसमा सबै नेता कार्यकर्ताको योगदान रहेको बताउदै उनले सांगठनिक एकता बिना उपलब्धी रक्षा हुन नसक्ने स्पष्ट पारे । सूर्यविनायक नगरपालिकामा एमालेको नेतृत्वमा स्थानीय सरकार रहेको छ भने कार्यपालिकामा दुई तिहाइ मत एमालेकै छ । इन्चार्ज बस्नेतले सो बिरासत अझ बढाउँन अधिवेशनले सक्षम नेतृत्व चयन गर्ने बिश्वास व्यक्त गरेका छन् ।

एमालेका पोलिटब्युरो सदस्य समेत रहेका बस्नेतले एमाले सुतिरहेको बाघ भएको बताए । सुतेको बाघको जुँगा उखल्न खोज्नेहरुलाई तह लगाउनपर्ने उनले जिकिर गरे । एमाले कमजोर भयो भन्ने हल्ला फ़ैलाइएको भन्दै उनले ७ मंसिरमा उपत्यकाको शक्ति देखाउने कार्यक्रम रहेको पनि बताएका छन ।

उनले प्लेन र पार्टी पुरानो नहुने भन्दै एमालेले आफूलाई आउट डेट नभई अपडेट गरेको बताए । सो अवसरमा नेता बस्नेतले रास्वपा सभापति रवि लामिछानेलाई सरकारले नभई अदालतको आदेशले अनुसन्धान गरिएको जिकिर पनि गरे । दिपक मनांगे जेल चलान हुँदा उनका ग्याङ्गले बिरोध नगरेका उल्लेख गर्दै उनले भने ” रास्वपा दिपक मनांगेको ग्याङ्ग भन्दा खत्तम रहेछ ।”