मङ्सिर १६ मा मतदान हुने उपनिर्वाचनले दलहरु अग्निपरीक्षामा छन् । गणतन्त्र नेपालका प्रथम प्रधानमन्त्री रहेका नेकपा(माओवादी केन्द्र)का अध्यक्ष प्रचण्डले उपनिर्वाचन भ्रष्टाचारको पक्ष र विपक्षमा जनमत संग्रह जस्तै भएको सावजनिक अभिव्यक्ति दिएपछि मतदाताहरु थप सचेत भएका देखिन्छन ।

पछिल्लो समय सत्तारुढ दलहरुको राजनीतिक प्रतिष्ठा कमजोर बन्दै गर्दा बिपक्षी दलहरु र स्वतन्त्र उम्मेदवारहरु हौसिएका छन् । भ्रष्टाचारबिरुद्ध र सुशासनको पक्षमा रहेको प्रचण्ड नेतृत्वको अघिल्लो सरकार ढालेर पहिलो र दोश्रो ठुलो दल नेपाली काँग्रेस र नेकपा(एमाले)ले मध्यरातमा मिलिजुली गठबन्धन गरेपछि यी दलहरु आलोचित मात्र भएका छैनन, कार्यकर्ता समेत रक्षात्मक बन्न बाध्य छन् ।

स्थानीय तहका ४१ पदमा हुन लागेको उपनिर्वाचनमा बिपक्षी दलहरु आक्रामक भएका छन् भने सत्तारुढ दलहरु आफ्नो बचावमै केन्द्रीत देखिन्छन । जनमत कुन दलमा अथवा दलबाहिर छ भन्ने संकेतका लागि यो उपनिर्वाचनलाई ट्रेलरको रुपमा हेर्न सकिने राजनीतिक विश्लेषकहरु बताउछन् । त्यसैले पनि उपनिर्वाचनलाई आफ्नो पक्षमा पार्न दलहरुले दौडादौड गरेको देखियो भने स्वतन्त्र उम्मेदवारहरु पनि प्रसस्तै खटिएका देखिए ।

स्थानीय तहका ४१ पदमा २ गाउँपालिका अध्यक्ष पदमा र एक नगरपालिका प्रमुखकै लागि भिडन्त भैरहेको छ । राजधानीकै नगर क्षेत्र कीर्तिपुर नगरपालिकामा प्रमुखको चुनाव हुने भएपछि उपचुनावको प्रमुख आकर्षणको केन्द्र कीर्तिपुर बन्न पुगेको प्रष्ट छ, सबैको ध्यान यतातिरै खिञ्चिएको छ । प्रमुख प्रतिपक्ष दल नेकपा (माओवादी केन्द्र)ले कीर्तिपुरको प्रमुख पदमा यो पटक जीतको नजिक देखिएको दावी गर्दै आएको छ । कीर्तिपुरको नगर प्रमुखमा माओवादीले प्राडा. शिवशरण महर्जनलाई उम्मेदवार बनाएको दिन देखि नै बौद्धिक वर्ग उत्साहित देखिएका छन् ।

पूर्ण साक्षर नगर भएकोले पनि मतदाताले शिव शरणको बौद्धिक छवि मन पराएका छन् । बौद्धिक, बिकासका अगुवा, निष्कलङ्क, सामाजिक व्यक्तित्व, सहयोगी भावना र सरल स्वभावका प्राडा महर्जन कीर्तिपुरवासीबिच निकै लोकप्रिय छन् । कीर्तिपुरमा शिक्षा, स्वास्थ्य, खानेपानी, सामाजिक न्याय, सुशासन, भौतिक पूर्वाधार लगायत क्षेत्रमा विशेष योगदान गरेका उनी घरदैलोमा जाँदा पाएको मतदाताको प्रतिक्रिया बाट निकै उत्साहित भएको बताउँछन् ।

पछिल्लो समय माओवादी केन्द्रप्रति जनताको जनमत केन्द्रीत भएको र आफूलाई हरेक वर्ग र पेशाका मतदाताले माया र आशिर्वाद दिएको प्राडा महर्जन सुनाउँछन् । ”घर दैलोमा जाँदा मतदाताले बिकास बारे गुनासो गर्नुभयो” उनले भने, ” कतिपयले अघिल्लो पटक न्याय गर्न नसकेको भन्दै यस पटक न्याय गर्ने बचन नै दिनुभयो ।” उनले जितको आधार सुनाए ।

अघिल्लो निर्वाचनको तुलनामा अहिले नेकपा एकीकृत समाजवादी, जसपा, नेसपा र स्वतन्त्र उम्मेदवारहरू नवरथकुमार बानिया, राजमान महर्जन, कविकुमार महर्जन, दिनेशकुमार अधिकारी लगायतले समर्थन गरेका कारण पनि जित सहज हुने माओवादीको बिश्वास छ ।

कीर्तिपुरमा सबैभन्दा बढी चर्चामा रहेका उम्मेदवार हुन् प्रा.डा. शिवशरण महर्जन । नेकपा (माओवादी केन्द्र) ले महर्जनलाई अगाडि सारेसँगै कीर्तिपुरमा राजनीतिक हलचल ल्याएको थियो । उम्मेदवारी घोषणादेखि प्रचारप्रसारको अन्तिम दिनसम्म डा. महर्जनको पक्षमा चुनावी माहोल र चर्चा एकपछि अर्को बढ्दै गएको छ ।

विहीबार कीर्तिपुरका बुद्धिजीविहरुले सुशासनको लागि पनि डा. शिवशरणलाई जिताउनैपर्ने बताए । कीर्तिपुरको विकासको लागि डा. शिवशरण जतिको सक्षम व्यक्ति नभएको बुद्धिजीवीहरुले बताएपछि उनको माहोल अझ बलियो बन्न पुग्यो ।

‘म माओवादी बाहिरको भएपनि उहाँको नैतिक, आदर्श र उच्च सामाजिक व्यक्तित्वका कारण हामी उहाँलाई जिताउन खटिरहेका छौं ।’ नागरिक अगुवा श्याम श्रेष्ठले भने ।

त्यसैगरी प्र.डा.चन्द्रमान बज्राचार्यले डा.महर्जनको जित शुनिश्चित रहेको बताउँदै कीर्तिपुरमा भिजनसहितको यतिको उम्मेदवार पाउँदा नगरवासी खुसी भएको बताए । उनले कीर्तिपुरको घरघरमा र मनमनमा डा. महर्जन भएको बताए । बागमती प्रदेशका पूर्व मुख्यमन्त्री एवं नेकपा(एकीकृत समाजवादी )का उपाधयक्ष राजेन्द्रप्रसाद पाण्डेले प्राडा शिवशरणको जीत घोषणा गर्न मात्रै बाकी रहेको बताए । उनले अहिलेसम्मको माहौल मौन अवधीभर बचाउन सकेमात्रै पनि जीत पक्का भएको जिकिर गरेका छन् ।

विहीबार अन्तिम चुनावी सभामा ब्यापक मतदाताकाे सहभागिताले पनि जनताकाे घरघरमा शिवशरण पुगेकाे पुष्टि भएको र जित सुनिश्चित देखिएको पूर्व उपसचिव एवं स्थानीय समाजसेवी प्रकाश महर्जन बताउँछन् ।

उपनिर्वाचनमा कांग्रेसका उम्मेदवार कृष्णमान डंगोल र एमालेबाट केन्द्रीय सदस्यसमेत रहेका डा.सुरेन्द्र मानन्धर चुनावी मैदानमा छन् । मुख्य प्रतिष्पर्धा तीन दलका उम्मेदवारबीच रहने आकलन गरिएपनि अन्य दल र स्वतन्त्र उम्म्मेद्वारले पनि उत्साहपूर्वक घरदैलो अभियान सम्पन्न गरेका छन् । आज मध्यरातबाट उपनिर्वाचनको मौन अवधी शुरु हुँदैछ ।