भक्तपुर, ९ पुस २०८१भक्तपुर अस्पतालकी मेडिकल डाइरेक्टर डा सुमित्रा गौतमले सचिवको जिम्मेवारी सम्हाल्ने भएकी छन् । बागमती प्रदेश सरकार अन्तर्गतको स्वास्थ्य मन्त्रालयमा उनी स्वास्थ्य सचिव पदमा नियुक्त हुने भएकी हुन् ।
संघीय सरकार मातहत ११ औं तहकी कर्मचारी रहेकी डा गौतमलाई सचिवको जिम्मेवारी दिने मन्त्री परिषदले निर्णय गरेसंगै उनको सचिव बन्ने ढोका खुलेको हो । स्वास्थ्य मन्त्री प्रदिप पौडेलको सिफारिसमा सोमबार बसेको मन्त्री परिषद बैठकले डा गौतमलाई बागमती प्रदेशको स्वास्थ्य सचिव पदमा नियुक्त गर्ने निर्णय गरेको छ । स्वास्थ्य सचिव बद्री खड्काको अवकाशपछि सो पद रिक्त रहेको थियो ।
संघीय सरकारको निर्णय संगै जनस्वास्थ्य तर्फका कर्मचारी सचिव बन्ने ट्रेण्डलाई तोड्दै डा गौतम प्रदेशमा पहिलो प्राविधिक सचिव बन्ने पक्कापक्की भएको प्रदेश सरकारका स्वास्थ्य मन्त्री किरण थापा मगरका स्वकीय सचिव संजीव थापाले बताएका छन् ।
डा गौतमलाई सचिव बनाउने संघीय मन्त्रीपरिषदको निर्णय प्रदेश स्वास्थ्य मन्त्रालयमा प्राप्त भैसकेको भन्दै उनले प्रदेश सरकारको अब बस्ने मन्त्री परिषद बैठकले डा गौतमलाई स्वास्थ्य सचिवमा नियुक्त गर्ने जानकारी दिए । “बिहीबार बस्ने प्रदेश मन्त्री परिषदको बैठकले डा सुमित्रा गौतमलाई स्वास्थ्य सचिव पदमा नियुक्त गर्नेछ ।” भक्तपुर पोस्टसंग उनले भने ।
स्वास्थ्य मन्त्री किरण थापा मन्त्रालयमा प्राविधिक सचिव हुनुपर्ने लबिङमा थिए । डा गौतमलाई सचिव नियुक्त गर्न उनले प्रधानमन्त्री केपी शर्मा ओली सम्म कुरा पुर्याएका श्रोतले जनाएको छ । भक्तपुर अस्पताललाई प्रदेशकै सर्वोत्कृष्ट अस्पताल बनाउन सफल डा गौतम गोल्ड्मेडलिस्ट चिकित्सक हुनुका साथै अब्बल प्रशासनीक नेतृत्व सावित कर्मचारी हुन् । आफू नेतृत्वको हरेक अस्पताललाई उदाहरणीय बनाएकी डा गौतमको स्वास्थ्य सचिवमा नियुक्तिले प्रदेशको स्वास्थ्य क्षेत्रमा गुणात्मक सुधार हुने अपेक्षा गरिएको छ ।