भक्तपुर, ९ पुस २०८१भक्तपुरको सूर्यविनायक-२ बालकोटमा बुवा र भाइको हत्यामा संलग्न रही फरार भएका भनिएका युवकले प्रहरीसमक्ष आत्मसमर्पण गरेका छन् । घटनापछि फरार जेठा छोरा मिलन आचार्यले मंगलबार आफै प्रहरीसमक्ष आत्मसमर्पण गरेका हुन् ।
खोटाङको रुपाकोट मजुवागढी- १ स्थायी घर भएका २६ वर्षीय मिलन २२ वर्षीय भाइ प्रवीणसंग ३ वर्षदेखि बालकोटमा डेरा गरी बस्दै आएका थिए । मिलन र उनका भाइ प्रवीणलाई भेट्न केही दिन अघि उनीहरूका ५६ वर्षीय बुवा कुलप्रसाद आचार्य डेरामा आएका थिए । कुलप्रसाद र कान्छा छोरा प्रवीण आचार्यको शव हत्या गरिएको अवस्थामा सोमबार फेला परेको थियो भने डेरामा जेठा छोरा मिलन आचार्य भने थिएनन् ।
साढे ३ तले घरको भुइँ तलामा २ वटा कोठा लिएर बसेका आचार्य दाजुभाइको तितो सम्बन्ध बारे छिमेकी पनि बेखबर छन् । बाबु र भाइको शव छुट्टाछुट्टै कोठामा फेला परेपनि मिलन सम्पर्क बिहीन रहेकाले हत्याको सूइ उनीतर्फ सोझिएको थियो ।
शनिवार राति घटना भएको थियो । कोठामा एकाएक ताला मारेर शुन्यता छाएपछि छिमेकीले प्रहरीलाई खबर गरेका थिए । सोमबार बिहान बेग्लाबेग्लै कोठामा बाहिरबाट ताला लगाइएको अवस्थामा प्रहरीले शव फेला पारेपछि घटना बाहिर आएको थियो ।
अनुसन्धानमा संलग्न एक प्रहरी अधिकृतले भक्तपुर पोस्टलाई दिएको जानकारी अनुसार आत्मसमर्पण गरेका मिलनले हत्या स्वीकार गरेका छन् । जीन्दगी देखि बिरक्त लागेर तनावकाबीच उनले बुवा र भाइको हत्या गरेको बयान दिएका बताइएको छ । हत्याको कारणमा प्रहरीले चित्त बुझाउन सकेको छैन । यद्यपि, यसबारे प्रहरीले पुष्टि भने गरिसकेको छैन ।
जिल्ला प्रहरी परिसर भक्तपुरका प्रमुख रहेका एसपी माधव प्रसाद बुढाथोकीले अनुसन्धान निस्कर्ष नजिक रहेको र घटनाबारे छिट्टै सत्यतथ्य बाहिर ल्याउने बताए ।
अपडेट :
जिल्ला प्रहरी परिसर भक्तपुरका डिएसपी रहेका सूचना अधिकारी ढुण्डिराज नेउपानेले मिलनले आत्मसमर्पण गरेको नभई उनलाई प्रहरीले हुलियाको आधारमा पक्राउ गरेको बताएका छन् । प्रहरी बृत्त महाराजगन्ज काठमाडौ बाट खटिएका प्रहरीले मिलनलाई हुलियाको आधारमा भाटभटेनी स्टोर्स क्षेत्रमा हिडिरहेको अवस्थामा पक्राउ गर्न सफल भएका उनको भनाइ छ ।
पक्राउ परेका मिलनले हत्या गरेको स्वीकार गरेका डिएसपी एवं सूूूचना अधिकारी नेउपानेले पुष्टि गरेका छन् । मिलनलाई भक्तपुर ल्याइएको र प्रहरी बृत्त थिमिमा राखी थप अनुसन्धान अघि बढाइएको उनले जानकारी दिए ।