भक्तपुर, १६ पुस २०८१प्रेस सेन्टर नेपाल, जिल्ला समन्वय समिति भक्तपुरले पुस २० गते शनिबारको दिन आफ्नो अधिवेशन गर्ने भएको छ । माघमा हुने केन्द्रीय महाधिवेशनको कार्यतालिका अनुसार जिल्लाले अधिवेशनको मिति तय गरेको हो ।
प्रेस सेन्टरको भक्तपुरमा पालिका समितिहरु समेत रहेको छ । जिल्ला अधिवेशन अघि सबै पालिका शाखाको अधिवेशन सम्पन्न गरिने जिल्ला अध्यक्ष संजीप घिमिरे शुभचिन्तकले जनाएका छन् । प्रदेश अध्यक्ष नवराज दाहाल र जिल्ला इन्जार्ज एकराज दाहालको आतिथ्यतामा सम्पन्न बैठकले पालिका शाखामा अधिवेशन सम्पन्न गर्न संयोजक समेत तोकेको उनले जानकारी दिए ।
बैठकले चाँगुनारायण नगरपालिकामा सचिव मदन ढुङ्गाना, सूर्यविनायकमा कोषाध्यक्ष निराजन सिलवाल, मध्यपुर थिमि र भक्तपुर नगरपालिकामा क्रमशः सहसचिवद्वय प्रदिप श्रेष्ठ र निसा कुस्मालाई अधिवेशन सम्पन्न गर्ने जिम्मेवारी दिएको बताइएको छ ।
त्यसैगरी बैठकले उपाध्यक्ष बाबुकाजी श्रेष्ठलाई जिल्ला अधिवेशन प्रचार समिति संयोजक, महिला उपाध्यक्ष कन्चन किसीलाई अतिथी सत्कार र बाबुराम दाहाललाई ब्यवस्थापनको जिम्मेवारी दिएको छ । जिल्ला अधिवेशनको निर्वाचन समिति संयोजकको जिम्मेवारी भने शिक्षक जगन्नाथ डुम्रेले पाएका छन् । उनले यस् अघि सम्पन्न दोश्रो जिल्ला अधिवेशनमा समेत सोही जिम्मेवारी सफलतापूर्वक सम्पन्न गरेका थिए । अधिवेशनले नयाँ नेतृत्व चयन गर्ने बताइएको छ ।