भक्तपुर, २ फागुन २०८१कार्यसम्पादन मूल्यांकनको आधारमा भक्तपुरका ४ स्थानीय तहमध्ये मध्यपुर थिमि नगरपालिका सर्वोत्कृष्ट सावित भएको छ । यस वर्ष स्थानीय तहको संस्थागत क्षमता स्वमूल्यांकन (लिजा)मा दोश्रो भएको यो नगरपालिका कार्यसम्पादन मूल्यांकनमा भने पहिलो बन्न पुगेको हो ।
राष्ट्रिय प्राकृतिक श्रोत तथा बित्त आयोगले सार्वजनिक गरेको परिणाम अनुसार मध्यपुर थिमि नगरपालिकाले १०० पूर्णाङ्कमा ७०.७ अङ्क प्राप्त गरि जिल्ला प्रथम भएको प्रेस संयोजक जगत प्रजापतिले जानकारी दिए ।
आयोगको परिणाम अनुसार चाँगुनारायण नगरपालिकाले ६२.६ अङ्कसहित दोस्रो र भक्तपुर नगरपालिकाले ६२ अङ्क प्राप्त गरि तेस्रो स्थान हासिल गरेको छ । यसमा भक्तपुरका ४ स्थानीय तहमध्ये सूर्यबिनायक नगरपालिकाको भने कन्तबिजोक भएको छ । १०० पूर्णाङ्कमा ३७.७ अङ्क मात्र प्राप्त गरि सूर्यविनायक सबैभन्दा पछि परेको छ ।
प्रदेश तथा स्थानीय तहको कार्यसम्पादन मूल्याङ्कन कार्यविधि २०७८ को दफा ७ अनुसार कार्यसम्पादन मूल्याङ्कन गरी अङ्क प्रदान गरिएको आयोगले जनाएको छ ।