राजिव चन्द, काठमाडौँ ।
काठमाडौँको नाङ्लेभारेमा विद्यार्थीले टोले गुण्डा लगाएर आफ्नै शिक्षकमाथि निर्घात कुटपिट गरेका छन् ।
शंकरापुर गाउँ पालिका ३ नम्बर वडामा रहेको कालिकाचरण माध्यमिक विद्यालयमा कक्षा १० मा अध्ययनरत बिद्यार्थी प्रविण तामाङले आफ्नै शिक्षक सुरेश ठगुन्नालाइ गुण्डा लगाएर निर्घात कुटाएर सिकिस्त घाइते बनाएका हुन् ।
दार्चुला घर भइ कालिकाचरण माविमा अध्यापन गराउदै आएका शिक्षक ठगुन्नाले बुधबार तामाङलाइ कपाल धेरै लामो भएको भन्दै काटेर आउनु भनेका थिए । तर उनले कपाल नकाटेपछि उनलाई प्रधानाध्यापकको कार्यकक्षमा बोलाएर सम्झाइएको थियो ।
बिद्यार्थी तामाङले अनुशासन उलंघन गरेको भन्दै प्रधानाध्यापक प्रमोद प्रधानले सम्झाइरहेका बेला एक्कासि तामाङले बोलाएका टोले गुण्डाहरुले बिद्यालय कार्यालय भित्रै प्रवेश गरी ठगुन्नामाथि आक्रमण गरेका थिए ।
शिक्षक ठगुन्नालाई स्थानीय टोले गुण्डा गणेश लामा, दिनेश वाइवा र प्रदिप तामाङले आक्रमण गरेको बिद्यालय प्रसाशनले इमान्दार मिडियालाई जानकारी दिएको छ । विद्यालयका अनुसार उनीहरु कार्यालय प्रवेश गरेर कुर्ची टेबल र लट्ठीलगायतले आक्रमण गरेका हुन् ।
गुण्डाहरुको आक्रमणबाट घाइते शिक्षकको टाउको र गालाको हड्डीमा गम्भीर चोट लागेको छ । घाइते ठगुन्नालाई उपचारका लागि सुस्म कोइराला मेमोरियल अस्पताल साखुमा लागेपनि त्यहा उनको उपचार सम्भब नभएपछि कान्तिपुर मेडिकल कलेज सिनामंगल रिफर गरिएको छ ।
अहिले उनलाई आइसीयुमा राखेर उपचार भइरहेको प्रधानाध्यापक प्रमोद प्रधानले इमान्दार मिडियालाई जानकारी दिएका छन् । प्रअ प्रधानले दिएको जानकारीअनुसार उनलाई दिउसो ४ बजे आक्रमण गरिएको हो ।
उक्त घटनापछि बिद्यालय क्षेत्रको बाताबरण त्रासमय बनेको छ भने स्थानीय अभिभावकहरु आक्रोशित भएका छन् । आक्रमणकारीहरु एमालेनिकट भएको र घटनालाई राजनीतिक करण गर्न खोजिएको भन्दै दोषीलाई कानुनबमोजिम कारवाही गर्न विद्यालयले माग गरेको छ ।
घटनापछि प्रहरी घटनास्थल पुगेपनि आक्रमणकारीलाइ समात्न सकेको छैन । शिक्षकमाथि आक्रमण गर्ने टोले गुण्डाहरुलाई एमालेले संरक्षण खोजेको छ भने कुटाइ खाने शिक्षक काँग्रेस समर्थक भएका कारण दोषीलाई कारबाही हुने कुरामा शंका उत्पन्न भएको छ ।
विद्यालयले कार्यालय परिसरमै प्रवेश गरी यसरी आफ्नो शिक्षकमाथि आक्रमण गरिएका कारण दोषीलाई पक्राउ गरि कारबाही नगरेसम्म बिद्यालय अनिश्चितकालिन बन्द रहने सूचना जारी गरेको छ ।