एजेन्सी । उत्तरपश्चिमी नाइजेरियामा १ सय १० जना किसानको आमहत्या गरिएको संयुक्त राष्ट्रसंघले जनाएको छ । सुरुमा ४३ जना मारिएको बताइए पनि पछि मृतकको संख्या १ सय १० रहेको जनाइएको हो ।
नाइजेरियाको द्वन्द्वप्रभावित बोर्नो राज्यको राजधानी माइदुगुरीको कोशोबेमा शनिबार किसानको आमहत्या गरिएको हो ।
राष्ट्रसंघको मानवीय सहायताका नाइजेरिया संयोजक एडवार्ड कालोनाका अनुसार मोटरसाइकलमा आएका हतियारधारीहरुले खेतमा काम गरिरहेका किसानमाथि नृशंस आक्रमण गरेका थिए । तीमध्ये १ सय १० जनाको नृशंस हत्या गरिएको थियो भने केही घाइते भएका छन् । केहीलाई भने अपहरण गरिएको छ ।
निर्दोष सर्वसाधारणविरुद्ध यसवर्षकै सबैभन्दा ठूलो हिंसाको घटनाका रुपमा यसलाई लिइएको छ । यो घटनाको कसैले जिम्मेवारी नलिए पनि लडाकू समूह बोको हरामको संलग्नता भएको आशंका गरिएको छ ।