प्रधानमन्त्री केपी शर्मा ओलीसँग नेपालका लागि पाकिस्तानका राजदूत एब्रार एच हास्मीले शिष्टाचार भेट गरेका छन् । मंगलबार प्रधानमन्त्री निवास बालुवाटारमा भएको भेटमा दुुई पक्षीय सम्बन्ध र हितका विविधि छलफल समेत भएको छ ।

द्विपक्षीय व्यापार, पर्यटन, कृषि, नवीकरणीय ऊर्जा, विपद् व्यवस्थापन, शिक्षा र संस्कृति आदिमा हुँदै आएको सहयोग आदानप्रदानलाई अभिवृद्धि गर्ने विषयमागम्भीर छलफल भएको बताइएको छ ।

प्रधानमन्त्री ओलीले दक्षिण एसियाली क्षेत्रीय सहयोग सङ्गठन (सार्क) लाई सक्रिय बनाउन अध्यक्ष मुलुकका नाताले आफूहरुले पहल गरिरहेको र यसमा आबद्ध मुलुकले रचनात्मक भूमिका निर्वाह गर्नुपर्नेमा जोड दिएका उनको सचिवालयले जनाएको छ । कुनै दुुई मुलुकबीचमा आपसी समस्या हुन सक्ने भए पनि त्यसको प्रतिकूल प्रभाव सार्कजस्ता क्षेत्रीय सङ्गठनमा पर्न नहुने बताउँदै उनले नेपाल सार्कलाई बलियो बनाउन लागिपरेको बताए । उनले पाकिस्तान पनि सार्कलाई बलियो बनाउने पक्षमा रहेको बिश्वास ब्यक्त गरे ।

सो अवसरमा राजदूत हास्मीले आफूहरु पाकिस्तानमा सार्क शिखर सम्मेलन आयोजना गर्न तत्पर रहेको जानकारी दिदै सार्क देशहरूबीच मित्रता र भाइचाराको आवश्यकता औल्याए । आफूहरु आगामी दिनमा नेपालसँग विविध विषयमा थप सहकार्य गर्न इच्छुक रहेको समेत उनले अवगत गराए ।