काठमाडौँ महानगरपालिकाले कर असुल गर्न पञ्चेबाजासहित टोलटोलमा अभियान चलाएको भएपनि त्यसबारे उपप्रमुख हरिप्रभा खड्गी श्रेष्ठले नै आपत्ति प्रकट गरेकी छन् । यसबारे आफूसँग कुनै सल्लाह नभएको उनले बताएकी छन् ।

कर असुल गर्न पञ्चेबाजासहित टोलटोलमा अभियान कति प्रभावकारी भयो भनेर बुझ्न खोज्दा उपप्रमुख खड्गीले सो खुलासा गरेकी हुन् । आफू राजस्व परामर्श समितिको संयोजक भएको तर, यस विषयबारे आफूलाई जानकारी नभएको उनले जानकारी गराइन् ।

‘यो अभियान प्रभावकारी हुनु वा नहुनुमा फरक छ । यो विषय मसँग सोधेर गर्नुभएको होइन मेयरजीले,’ उनले भनिन । मेयरले मनोमानी ढंगले अभियान चलाएको यसले करदाता लाई आघात पुर्याएको भन्दै उनले असन्तुष्टि प्रकट गरिन् । एकै पटक यो अभियान शुरु गर्नुभन्दा पहिला एक पटक सबैलाई आधिकारिक रुपमा पत्र पठाउनुपर्ने उनको भनाइ छ ।

साथै, महानगरपालिकाले गरेको यो अभियानबाट धेरैले गुनासो गर्नेगरेको उनले जनाएकी छन् । ‘मलाई नै गुनासो आउन थालेको छ । महानगरपालिकाले बेइज्जत ग¥यो । एक पटक पत्र पठाएको भए हामी सल्लाह गर्न आउँथ्यौं । तर, महानगरले त्यस्तो गरेन भनेर ठूला करदाताबाट गुनासो आएको छ ।’ खड्गीले भनिन् ।

 यो पनि

कर नबुझाउने ७ ठूला करदाताको ढोकामा पञ्चेबाजा बजाउँदै पुग्यो महानगरपालिकाको टोली