भक्तपुर, ३० असोज २०७९नेकपा (एमाले) का तर्फबाट भक्तपुर २ मा उम्मेदवार रहेका निवर्तमान सांसद एवं पूर्वमन्त्री महेश बस्नेतले जीत कायम राख्ने जिकिर गरेका छन् । आफ्नो नेतृत्वमा भक्तपुरले बिकासको काचुली फेरेको बताउदै उनले आफूहरुलाई जनताले जिताउने जिकिर गरेका हुन् ।
एमाले निकट प्रेस चौतारी भक्तपुरद्वारा आयोजित ‘उम्मेदवारसंग संचारकर्मी’ विषयक एक कार्यक्रमलाई आइतवार सूर्यविनायकमा संवोधन गर्दै उम्मेदवार बस्नेतले सत्तारुढ गठबन्धन नेताहरु बीचको मात्र गठबन्धन भएको आरोप लगाए । सत्ता गठबन्धनलाई उनीहरुकै कार्यकर्ता र जनताले स्वीकार नगरेको उनको दावी छ । उनले निर्वाचनमा तेब्बर बढी मत ल्याएर जित्ने समेत जिकिर गरे ।
निर्वाचन पछि बालकोट निवासी आफ्ना पार्टी अध्यक्ष केपी शर्मा ओलीले सिंहदरवारको नेतृत्व गर्ने उद्घोष गर्दै नेता बस्नेतले सरकारको नेतृत्व अध्यक्ष ओलीले गर्ने र आफू पनि त्यसमा सहभागी हुने बताउदै सिंहदरवारले भक्तपुरलाई खोज्दै आउँन एमालेले जित्नुको बिकल्प नभएको बताए ।
उक्त अवसरमा निर्वाचन क्षेत्र नं. २ (क) प्रदेश सभा तर्फका उम्मेदवार किरण थापामगरले आफू वडाध्यक्ष हुँदा गरेको कामलाई सम्झेर पार्टीले उम्मेदवार बनाएको बताउदै वडाध्यक्ष हुदाँको जस्तै जनताको मन जित्ने गरी काम गर्ने प्रतिवद्धता प्रकट गरे ।
निर्वाचन क्षेत्र नम्बर २ (ख) का उम्मेदवार चन्दन कृृष्ण श्रेष्ठले सुखी नेपाली र संम्वृद्ध नेपालको नारालाई पुरा गर्न आफूहरू चुनावी मैदानमा उत्रिएको उल्लेख गरे ।
उक्त अवसरमा निर्वाचन क्षेत्र नम्बर १ का उम्मेदवार रहेका निवर्तमान जिसस प्रमुख नवराज गेलालले आफूले जिसस प्रमुख हुँदा गरेका कामको फेयरिस्त प्रस्तुत गर्दै निर्वाचित भएपछि गर्ने कामको कार्य योजना प्रस्तुत गरेका थिए ।
कार्यक्रममा निर्वाचन क्षेत्र नम्बर १ ‘क’ का उम्मेदवार मोहनवीर श्रेष्ठ र ‘ख’ का उम्मेदवार नारायण सुन्दर सिन्तकलाले समेत आफ्नो चुनावी एजेन्डा सुनाएका थिए ।
प्रेस चौतारी भक्तपुरका अध्यक्ष हेमराज ढकालको अध्यक्षतामा सम्पन्न कार्यक्रममा एमाले जिल्ला कमिटी अध्यक्ष बचन देउजा, प्रचार विभाग प्रमुख निरञ्जन बजगाई, समानुपातिक उम्मेदवारहरु लगायतको आतिथ्यता रहेको थियो ।