भक्तपुर, २४ कार्तिक २०७९भक्तपुर क्षेत्र नं. २ प्रतिनिधि सभा सदस्यका उम्मेदवार एवम् नेपाली कांग्रेस भक्तपुरका सभापति दुर्लभ थापाले कांग्रेस र गठबन्धनबारे भ्रम नफैलाउन प्रतिष्पर्धी दल एमालेका उम्मेदवार महेश बस्नेतलाई चेतावनी दिएका छन् ।
लोकतान्त्रिक वाम गठबन्धनको संयुक्त निर्वाचन परिचालन कमिटीले मध्यपुर थिमिको स्वंगा पुखुमा बुधवार आयोजना गरेको चुनावी सभालाई सम्बोधन गर्दै उनले उक्त चेतावनी दिएका हुन् । मंसिर ४ गतेको निर्वाचनमा हार्ने निश्चित भएपछि प्रतिष्पर्धी दलका उम्मेदवारले भ्रमको राजनीति शुरु गरेको र गठबन्धन बारे मतदातालाई भ्रमित पार्ने दुष्प्रयास गरेको उनले आरोप लगाए । भ्रम फैलाएर चुनाव जित्ने सपना नदेख्न समेत उनले सुझाव दिए ।
“आफ्नो पार्टी मिलाउन नसक्ने, पार्टीमा हैकमवाद लाद्न खोज्ने, पार्टी हो की व्यक्ति हो छुट्याउन नसक्नेहरुले अरुलाई पनि त्यस्तै देख्छन,” थापाले भने, ओली अधिनायकवाद विरुद्ध बिद्रोह गरेर कांग्रेससंग कम्युनिस्ट मिल्न आएपछि गठबन्धन बनेको बनाउदै सभापति थापाले यसले नै लोकतन्त्र बलियो बनाउने र बिकास एवम् समृद्धिको नेतृत्व गर्ने बताए ।
उनले आफ्नो दल मिलाउन नसक्नेहरुले कांग्रेसभित्र असन्तुष्टि भएको र गठबन्धनबीच एकता नभएको भन्दै भ्रम फैलाउन खोजेको आरोप लगाउँदैं चुनावी सभामा जनसमूदायको बाक्लो उपस्थितिले उनीहरुलाई गतिलो झापड दिएको दावी गरे । उनले प्रतिष्पर्धी उम्मेदवार महेश बस्नेततर्फ इंगित गर्दै विगतमा आफुले गरेका प्रतिवद्धता फर्केर हेर्न पनि आग्रह गरे ।
थापाले भने, “विगतमा यही ठाँउमा उभिएर गरेका प्रतिवद्धताहरु कति पुरा गर्नुभयो ? मतदातालाई एक पटक झुक्याउन सजिलो भएपनि बारबार त्यसो गर्न सकिने नठान्नुहोस । ” राजनीति नैतिकता र इमान्दारितामा आधारित हुनुपर्ने बताउँदैं थापाले आम मतदाताहरु झुटको राजनीतिबाट सचेत हुनुपर्नेमा जोड दिए । उनले समाजको सेवामा समर्पित हुनुपर्ने राजनीति अहिले कसैका लागि व्यवसाय भएको र रातारात अरबपति बन्ने हतियार बनेको आरोप समेत लगाए ।
मध्यपुर थिमि कला सँस्कृतिको धनी शहर भएको र यहाँको कला सँस्कृतिको जगेर्ना स्थानीय गुठीहरुले गरिरहेको चर्चा गर्दै उनले विगतमा नेवार समूदायको मतबाट निर्वाचित जनप्रतिनिधिले गुठी विधेयक मार्फत परम्परागत साँस्कृतिलाई मास्न खोजेको स्मरण गराउदै आफ्नो तर्फबाट यस्तो जनघात नहुने प्रतिवद्धता पनि पेश गरेका थिए ।