सँझ्या: साहित्यको नियमित शृङ्खलामा शनिबार तीन कविहरूले आ-आफ्ना कविता सुनाएका छन् । भक्तपुरको नयाँ थिमिस्थित द बिन्ज एण्ड बाइट्ज क्याफेमा आयोजित काब्यिक शृङ्खलामा उनीहरूले आफ्ना पाँच-पाँच कविता सुनाएका हुन् ।

भर्खरै डोरम्याट कविता सञ्चनसहित प्रकाशन गरेका कवि तथा नियात्राकार छविरमण सिलवालले रङ, धुवाँको सिँढी, रूख, यो पृथ्वी कसको हो र जब ठेकेदार हराउँछन् कविता सुनाए । विभिन्न समय र घटनाक्रमका साथै भोगाइ र अनूभूतिजन्य कवितालाई हृदयले लेख्नसक्ने कवि छविरमणका कोमल कविता सबैले मन पराए ।

त्यस्तै, कवि दिलकुमारी डङ्गोलले -दुर्गन्धको पर्खाल, धमिराहरूको म्याराथन, कालोकोट, शालिक र म, सुन्दर रात कवितामार्फत समसामयिक राजनीति र आफूलाई मन पर्ने जीवनको रङ कवितामार्फत प्रस्तुत गरिन्।

कवि सिजन श्रेष्ठले – उड्ने खोलो, तिम्रो नाम, मानिसको अनुवाद, बोध एक अन्तर्य र पाटन शीर्षकमा प्रस्तुत गरे । उनीहरू सबैका कविताले सहभागीको मन छोएको देखिन्थ्यो ।

कार्यक्रममा साहित्यकार र साहित्यानुरागीहरुको उल्लेखनीय उपस्थिति रहेको थियो । सो अवसरमा कवि कमला डिसीको बोनस रचना पनि बाचन गरिएको थियो । मोफसलकी डिसीले आफ्ना केही मुक्तक र एक कविता प्रस्तुत गरिन ।

चाक्लाफल्चाको सह आयोजनामा सम्पन्न सँझ्या: साहित्यको यो शृङ्खलामा कवि छविरमण सिलवाल र वसन्त कार्कीले स्वागत सत्कारको प्रवन्धमा साथ दिएका थिए ।

‘कला र कविताको पक्षमा’ भन्ने उद्गार सहित शुरु गरिएको सँझ्या: साहित्यको साहित्यिक यात्रामा सयौं साहित्यकार यात्रारत छन् । प्रत्येक महिनाको अन्तिम शुक्रवार कविता सुन्ने र सुनाउनेहरुको संगम बन्दै आएको छ ।

कविहरू अभय श्रेष्ठ, रामगोपाल आशुतोष, हरिहर तिमिल्सिना, नविनप्रकाश लगायतको सक्रियतामा सँझ्या: साहित्य सञ्चालन हुँदै आएको देखिन्छ ।