भक्तपुर, २६ असोज २०८१यसपालिको दसैंमा,
यसपालिको तिहारमा,
यसपालिको छठमा
टोपी लगाउन नभन्नुहोला!
खादा ओढ्न नभन्नुहोला!
यसपालिको जाडोमा,
पुष-माघको ठन्डीमा
टोपी लगाउन नभन्नुहोला!
मफलर बेर्न नभन्नुहोला!
बरू,
म त सगर्व बेर्छु प्यालेस्टिनी स्कार्फ
प्यालेस्टिनी स्कार्फ अर्थात् स्वतन्त्रताको प्रतीक
प्यालेस्टिनी स्कार्फ अर्थात् ऐक्यबद्धताको प्रतीक।
म त सहर्ष बेर्छु केफिए अर्थात प्यालेस्टिनी स्कार्फ
अनि गाउॅंछु, संसारले सुन्नेगरि
ऐक्यबद्धताको गीत,
शान्तिको गीत।
अनि गाउॅंछु, संसारले सुन्नेगरि
प्रतिरोधको गीत,
न्यायको गीत।
आऊ, सबै मिलेर लगाऔॅं केफिए
र, सबै मिलेर गाऔॅं मुक्तिको गीत
यत्रतत्र सर्वत्र देखून् युद्धपिपासूहरूले
केफिए नै केफिए, केफिए नै केफिए।
यत्रतत्र सर्वत्र देखून् नरभक्षकहरूले
कमरेड नै कमरेड, कमरेड नै कमरेड।
अरवमा मात्र होइन एसिया, युरोपमा
अरवमा मात्र होइन अफ्रिका, अमेरिकामा।
र, सबै महादेशहरूमा गुन्जियोस् मुक्तिको गीत।
रगतमा चोपिएका हर एक केफिए सम्झेर भनौं
“युद्ध बन्द गर!”, “नरसंहार बन्द गर!”
धुजा धुजा पारिएका हर एक केफिए सम्झेर भनौं
“नवनाजीवाद मुर्दावाद!”, “जातीय संहार मुर्दावाद!”
असोज २६, विजया दशमी २०८१
(कवि गोसाइँ बागमती प्रदेश सभाका माननीय सदस्य एवं नेमकिपाका भक्तपुर जिल्ला अध्यक्ष हुनुहुन्छ ।)