भक्तपुर, २८ पुस । महाभूकम्पको बेला आफ्नो ज्यानको परवाह नगरी अरुको ज्यान बचाए वापत एक युवा सम्मानित भएका छन । भक्तपुरमा उनले देखाएको बहादुरी वापत छिमेकी मुलुक श्रीलंकाले उनलाई सम्मान गरेको हो ।
युवा लक्ष्मीसुन्दर गाइञ्जुलाइ श्रीलंकामा ‘नागरिक वीरता स्वर्ण पदक’द्वारा सम्मानित गरियो ।
उनलाई श्रीलंकाको राजधानी कोलम्बोमा बुधबार आयोजित एक विशेष समारोहका बीच त्यहाँका सभामुख करु जयसूर्याले सम्मान ‘नागरिक वीरता स्वर्ण पदक’ द्वारा सम्मान गरेका हुन् । सो सम्मान पाउने गाइञ्जु पहिलो नेपाली नागरिक हुन् ।
सभामुख जयसूर्याले मानवीय कार्यालाई उत्प्रेरित गराउने यस्तो पदक प्रदान गर्न पाउँदा आफूलाई ठूलो सन्तोष मिलेको बताएका थिए भने उक्त कार्यक्रममा मनोनयनकर्ताका तर्फबाट विशेष रुपमा आमन्त्रित डा दिनेशराज भुजुले गाइञ्जु असल र हिम्मति युवाहरुको प्रतिनिधि पात्र मात्र भएको र यस्ता धेरै युवाले भूकम्पको बेलामा वीरता प्रदर्शन गरेको जानकारी गराएका थिए ।
सम्मानित गाइञ्जुले २०७२ साल वैशाख १२ गतेको भूकम्प गएपछि उक्त दिन भक्तपुरको जेँला टोलमा भूकम्पले घर भत्किएर च्यापिएका ८ परिवारका २१ जनाको जीवितै उद्धार गरेका थिए । उनी भूकम्पपछि पनि निरन्तर पीडितको सेवामा खटिँदै आएका बताइएको छ ।