भक्तपुर, ११ माघ मोटरसाइकल ट्याक्सीमा ठोक्किएर भक्तपुरको सृजनानगरमा सल्लाघारीका ३५ बर्षिय रोशन बस्नेतको मृत्यु भएको एक साता नबित्दै बुधबार साँझ भएको सवारी दुर्घटनामा अर्का एक युवाले ज्यान गुमाएका छन ।
सूर्यविनायक नगरपालिका–९ नलिनचोकमा बुधबार साँझ ८:३५ बजेको समयमा स्कुटर र ट्रक ठोक्किदा स्कुटर चालक ३९ बर्षका प्रकाश मानन्धरको मृत्यु भएको हो । काभ्रेको बनेपा नगरपालिका–६ घर भएका मानन्धरको भक्तपुर अस्पतालमा मृत्यु भएको हो ।
बनेपातर्फ जाँदै गरेको बा ६८ प ४४७१ नं को स्कुटर विपरित दिशाबाट आइरहेको ना ६ ख ५९१९ नं को मालबाहक ट्रकसंग ठोक्कीएपछि गम्भीर घाइते स्कुटी चालक मानन्धरलाइ भक्तपुर अस्पताल पुर्याइएको थियो । अस्पतालले उनलाई साँझ नै मृत घोषणा गरेको प्रहरीले जानकारी गराएको छ ।
ट्रक र चालकलाई नियन्त्रणमा लिएर आवश्यक अनुसन्धान गरिरहेको महानगरीय प्रहरी वृत्त जगातीले जनाएको छ ।
पछिल्लो समय भक्तपुरमा सडक दुर्घटनाको समाचारले मानिसहरु त्रस्त बनेका छन् । साँझको समयमा तिब्र गतीका कारण दुर्घटना बढेको प्रहरीको दावी छ तर मानिसहरु ट्राफिकले पर्याप्त निगरानी नपुर्याउदा दुर्घटनाको जोखिम बढेको बताइरहेका छन् ।