News Portal

  • हेटौडामा कर्मचारीको सेटीङमा यस्तो कर्तुत, सीडीओ बने रमिते

    इभक्तपुर संवाददाताहेटौडा, २१ माघ
    ८१८ पटक
    हेटौडा, २१ माघ

    सरकारले नविकरण नगर्दा अबैध बनेका क्रसर उद्योगहरुलाई कर्मचारीको सेटिङमा गिटी बालुवा तस्करीको बाटो खुलेको छ । विकास आयोजनाको नाममा क्रसर उद्योगहरुलाई जिल्ला समन्वय समितिले गिटी बालुवा उत्खनन्को अनुमति दिएपछि लुकिछिपी भइरहेको गिटी बालुवा तस्करी खुलमखुल्ला सुरु भएको हो ।

    क्रसर ब्यवसायीहरुको लामो समयको दौडधुपपछि जिल्लास्थित नियमनकारी निकायहरुलाई सेटिङ मिलाएर जिल्ला अनुगमन समितिको स्वीकृतिमा जिल्ला समन्वय समितिले गिटी बालुवा तास्करीको बाटो खुलाएको हो । गत वर्ष नै इआए गरेको परिणाम भन्दा बढी नदीजन्य पदार्थ उत्खनन् गरिएकोमा यस वर्ष पनि क्रसर उद्योगहरुले मेसिन प्रयोग गरी खोला उत्खनन् सुरु गरेको हो ।

    अघिल्लो वर्षजस्तै यस वर्ष पनि बिना कुनै आधार सेटिङको भरमा जिल्ला समन्वय समितिले गिटी बालुवा तस्करीको बाटो खोलेको तथ्य फेला परेको छ । जिल्ला समन्वय समितिलाई गिटी बालुवा उत्खनन् अनुमतिको आधार माग कुनै पनि प्रमाण दिन सकेन ।

    जिल्ला समन्वय समितिले २०७२ साल माघ २५ गते संघीय मामिला तथा स्थानीय विकास मन्त्रालयका शाखा अधिकृतले हस्ताक्षर गरेको चिठ्ठी देखाएर पन्छिने गरेको छ ।

    २०७२ माघ २० गते मन्त्रीपरिषदले नेपाल सरकारले सञ्चालन गरेको विकास आयोजनाहरुको लागि आवश्यक पर्नेे गिटी बालुवा आयोजना आफैले उत्खनन् संकलन गर्न सक्ने र त्यसको परिणाम जिल्ला समन्वय समितिले तोकिदिने निर्णय गरेको थियो ।

    उक्त निर्णयको गलत फाईदा उठाउँदै जिल्ला समन्वय समितिले विकास आयोजनाको नाममा क्रसर उद्योगलाई उत्खनन् अनुमति दिएको हो ।

    डेढ लाख रुपैयाँमा चिठ्ठी बिक्री

    जिल्ला समन्वय समितिले क्रसर उद्योगहरुलाई विकास आयोजनाको नाममा गिटी बालुवा उत्खनन् अनुमति दिएको चिठ्ठी डेढ लाख रुपैयाँमा बिक्री भएको पत्ता लागेको छ । स्थानीय विकास अधिकारी नारायण प्रसाद मैनालीले प्रत्येक चिठ्ठीमा हस्ताक्षर गरे बापत डेढ लाख रुपैयाँमा बिक्री गरेको स्रोतको दाबी छ ।

    ‘विकास आयोजनाको नाममा उत्खनन् अनुमतिको चिठ्ठी लिँदा डेढ लाख रुपैयाँ जिविसका कर्मचारीले लिने गरेको छ’, एक कर्मचारीले भने, ‘धमाधम त्यस्तो चिठ्ठी बिक्री भइरहेको छ ।’ त्यसको सेटिङ भने जिल्ला समन्वय समितिमार्फत नदीजन्य पदार्थको कर उठाउने ठेकेदार शंकर न्यौपानेले मिलाउने गरेको स्रोतको दाबी छ ।

    ‘न्यौपानेले विकास आयोजनाको नाममा लिएको चिठी बोकेर हिँडेका छन्, प्रत्येक क्रसर उद्योगलाई डेढ लाख रुपैयाँमा बिक्री गर्ने गरेको छ’,स्रोतले भन्यो । यता स्थानीय विकास अधिकारी मैनालीले भने आफुले जोखिम मोलेर अनुमति दिएको बताए । ‘क्रसर उद्योगलाई अनुमति दिन बाध्य भयौं’,उनले भने,‘अलिअलि रिस्क मोलेर काम गरेका हौं ।’

    सबै नियमनकारी निकाय मौन

    जिल्ला अनुगमन समिति समेत उक्त विषयमा मौन बनेको छ । प्रमुख जिल्ला अधिकारी चक्रबहादुर बुढाले क्रसर उद्योगहरुको अनुगमन गर्दा समेत मुकदर्शक बनेका छन् । विकास आयोजनाको नाममा उत्खनन् स्वीकृति दिए पनि धमाधम क्रसर उद्योगहरुमा गिटी बालुवा थुपार्ने काम भइरहेको छ । उत्खनन् अनुमति नपाएका क्रसर उद्योगहले अबैध ढंगबाट नदीजन्य पदार्थ संकलन गर्दा प्रमुख जिल्ला अधिकारीले अनुगमन गरी आवश्यक कारबाही गर्न सक्छ । तर उनी यस विषयमा मौन बसेका छन् ।

    प्रजिअ बुढाले क्रसर उद्योगहरुलाई नभै विकास आयोजनालाई उत्खनन् अनुमति दिएको बताए । तर, आयोजनाको नाममा उत्खनन् भएको गिटी बालुवा क्रसर उद्योगहरुले ओसार्दा समेत उनले कुनै कदम चाल्न सकेका छैनन । बुढाले व्यवहारिकता हेरेर सबै पक्षको सहमतिमा उत्खनन् अनुमति दिएको बताए ।

    साथै उक्त विषयमा अख्तियार दुरुपयोग अनुसन्धान आयोग समेत मौन देखिएको छ । अबैध ढंगले तस्करी बढे पनि अख्तियारले कुनै चासो नदिँदा उसको समेत संलग्नताको आशंका गरिएको छ ।

    क्रसर व्यवसायीहरु धमाधम उत्खनन् गर्दै

    क्रसर ब्यवसायीहरुले जिल्ला समन्वय समितिमार्फत विकास आयोजनाको नाममा अनुमति लिएर गिटी बालुवा उत्खनन् गरिरहेको छ । मेसिन प्रयोग गरी विकास आयोजनाको नाममा उत्खनन् गरी बजारमा उत्पादन बिक्री समेत भएको छ ।

    क्रसर ब्यवसायीहरुले जिल्लाका सरोकारवालाहरुसँग अन्तरक्रिया गरेर उत्खनन्को माहौल बनाएका थिए । सबै पक्षलाई सेटिङ मिलाएर काम थालिएको हो । सेटिङ मिलाउन क्रसर ब्यवसायी संघका अध्यक्ष राजाराम कार्की, व्यवसायी सिताराम न्यौपाने, शंकर न्यौपाने, रञ्जन कालाखेती लगायत सक्रिय छन् ।

    प्रतिकृया दिनुहोस्

    भक्तपुर जिल्ला अदालतका ३ हजार ६ सय ८१ मुद्दा फर्छ्यौट

    भक्तपुर जिल्ला अदालतमा एक वर्षमा ३ हजार ६ सय ८१ मुद्दा फर्छ्यौट गरिएको बताइएको छ...

    एसईईमा राम्रो नतिजा ल्याउने विद्यार्थी र विद्यालयलाई एनप्याब्सन भक्तपुरको अभिनन्दन

    नेसनल प्याव्सन भक्तपुरले आफ्ना सदस्य विद्यालयहरुबाट यस वर्षको माध्यमिक शिक्षा उतीर्ण परीक्षा (एसईई) मा सम्मिलित...

    प्रधानमन्त्री ओलीसहित २१ मन्त्रीले लिए सपथ

    प्रधानमन्त्री केपी शर्मा ओलीले प्रधानमन्त्रीको शपथ लिएका छन् । सोमबार राष्ट्रपति कार्यालय शीतल निवासमा आयोजित...

    नौ भाषामा दखल भएका रिजाललाई ५० हजार राशीको प्रतिभा पुरस्कार

    भाषा तथा सस्कृतिकर्मी भक्ती रिजाल प्रादेशिक “प्रतिभा” पुरस्कार बाट सम्मानित भएका छन् । रिजाललाई संघीय...

    दुर्लभ थापा मन्त्री बन्ने वा नबन्ने भन्नेबारे यस्तो छ महेश बस्नेतको भनाइ

    mahesh basnet bhaktapur 2

    पूर्व मन्त्री एवं नेकपा एमालेका पोलिटब्युरो सदस्य महेश बस्नेतले भक्तपुर-२ का प्रतिनिधि सभा सदस्य दुर्लभ...