आइसिसी विश्व क्रिकेट लिग डिभिजन टु अन्तर्गत समूह चरणको अन्तिम खेलमा नेपालले क्यानाडालाई हराएको छ । १९५ रनको लक्ष्य पछ्याएको नेपालले अन्तिम बलसम्म खेल्दै रोमान्जक जीत निकालेको हो ।

टस हारेर पहिलो ब्याटिङ गरेको क्यानाडाले ५० ओभरमा ८ विकेटको क्षतिमा १ सय ९४ रन बनाएको थियो । जावाफी ब्याटिङमा ओर्लिएको नेपालले १४४ रन जोड्दा ९ विकेट गुमाइसकेको थियो तर करण केसी र सन्दिप लामिछानेको जोडी जमेपछि रोमान्जक जीत हासिल भयो । जीत निकाल्न अन्तिम बलसम्म खेल्नुपरेको खेल ज्यादै रोमाञ्चक बनेको थियो ।

करण नै जीतको निर्यायक खेलाडी बने । उनले ३१ बलमा ३ चौका र ४ छक्का हान्दै नटआउट ४२ रनको योगदान गर्दै नेपाललाई जीत मात्र दिलाएनन विश्वकप छनौट खेल खेल्ने यात्रा तय गराउन समेत मद्दत गरे ।

पारस खड्काको कप्तानीमा रहेको नेपाली टोलीमा उपकप्तान ज्ञानेन्द्र मल्ल, शरद भेषवाकर, ललित भण्डारी, वसन्त रेग्मी, सोमपाल कामी, शक्ति गौचन, अनिलकुमार साह, मोहमद अरिफ, रोहितकुमार पौडेल, करण केसी, सन्दिप लामिछाने, दीपेन्द्रसिंह ऐर र दिलिप नाथ थिए ।