४ वैशाख । विराटनगरस्थित भारतीय राजदूतावासको कन्सुलरको कार्यालय नजिकै अपरिचित समूहले बम विस्फोट गराएको छ ।
सोमबार राति भारतीय कार्यालयलाई लक्षित गरेर बम विस्फोट गराएको प्रत्यक्षदर्शीले जनाएका छन् । बस्फोटबाट कुनै पनि मानवीय क्षति भएको छैन ।
बिस्फोटको जिम्मेवारी कसैले लिएको छैन । यद्यपि बम विस्फोट नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा)ले गराएको हुन सक्ने उच्च सुरक्षा स्रोतको भनाइ छ ।
भारतीय कन्सुलरको कार्यालयलाई ‘नेकपा’ले आफ्नो निशाना बनाउँदै आएको छ । सो कार्यालय हटाउन साना कम्युनिष्ट पार्टीहरूले लामो समयदेखि माग गर्दै आएका छन् ।
भारतीय दूतावासको विराटनगरस्थित सम्पर्क कार्यालय २०६५ सालमा कोशी बाँध फुटेको बेला बाँध बनाउन भन्दै स्थापना गरिएको थियो । कोशी बाँध निर्माण भइसके पनि अझै कार्यालय हटेको छैन ।