डोल्पामा नेत्रविक्रम चन्द विप्लव नेतृत्वको नेकपाका कार्यकर्ताले प्रहरी माथि आक्रमण गरेका छन् ।

आइतबार नेपाल बन्दको क्रममा बजार बन्द गराउँदै हिडेका सागर शाहीलाई प्रहरीले पक्राउ गरेको थियो । पक्राउ परेका शाहीलाई प्रहरीले सदरमुकाम दुनै पुर्याउने क्रममा सोमबार बिहानै नेकपाका कार्यकर्ताले बीच बाटोमा प्रहरी माथि आक्रमण गरेर उनलाई छुटाइ लिएका छन् ।

पक्राउ परेका आफ्ना कार्यकर्ता सागर शाहीलाई छुटाउन उनीहरुले प्रहरीमाथि आक्रमण गरेका हुन् । आक्रमणबाट प्रहरी हवलदार धनसिँ कठायत र प्रहरी जवान जयलाल बस्नेत सामान्य घाइते भएका छन् । नेकपाका जिल्ला इन्चार्ज अजित बिष्टको नेतृत्वमा आएको पाँच जनाको समुहले प्रहरीमाथि आक्रमण गरेको प्रहरी नायव उपरीक्षक हरिप्रसाद शर्माले जानकारी दिए,
मुड्केचुला गाउँपालिका–९ घर भएका शाही नेकपाका जिल्ला कमिटी सदस्य हुन् । शाहीलाई छुटाउन नेकपाका कार्यकर्ताले ठुलीभेरी नगरपालिका–९ अन्तरगत पर्ने भेत्ति डाँडोमा जीप भित्रै ढुङ्गा प्रहार गरि आक्रमण गरेका हुन् ।

आक्रमणकारीलाई पक्राउ गर्न त्रिपुराकोट जुफाल कालागौडा र दुनै बाट ईन्सपेक्टरको नेतृत्वमा ३५ जनाको संख्यामा प्रहरी परिचालन गरिएको छ । सागरसँगै पक्राउ परेका नेकपाका बिबश शाही र दिनेश सिंहलाई भने प्रहरीले आइतबार साँझ नै छाडि सकेको थियो ।