भक्तपुर, ३ असार चौथौं उपत्यकाव्यापी आमन्त्रण बास्केटबल प्रतियोगिताको जुनियर व्याइजतर्फको उपाधि ज्ञान निकेतन स्कूल काठमाडौले हात पारेको छ । आइतबार भएको फाइनल खेलमा हिमालय स्कूल काेटेश्वर काठमाडौलाई १४ का विरुद्ध ३१ प्वाइन्टले पराजित गरी ज्ञान निकेतनले उपाधि हात पारेको हो ।
मित्रता पहिलो, प्रतिस्पर्धा दोश्रो भन्ने नाराका साथ आइतबार नै भएको सिनियर व्याइजतर्फको उपाधि होप भ्याली स्कूल काठमाडौले जितेको छ । हिमालयलाई १७ का विरुद्ध १९ प्वाइन्टसले पराजित गर्दै होप भ्याली विजयी भएको हो ।
सिनियर व्याइज खेल थ्री अन थ्री (तीनतीन जना) वीच भएको थियो ।
साथै यसअघि आइतबार नै भएको गल्र्सतर्फको उपाधि इनोभेटिभ स्कूल ललितपुरले जितेको छ । श्री चन्द्रविन्दु स्कूल काठमाडौलाई पराजित गरी इनोभेटिभ विजयी भएको हो ।
प्रतियोगिताका विजयी स्कूल तथा खेलाडीहरुलाई भक्तपुर नगरपालिकाका प्रमुख सुनिल प्रजापतिले शिल्ड, मेडल तथा प्रमाणपत्र वितरण गरे । कार्यक्रममा रेफ्री सुवाश दर्शनका साथै सहभागी स्कूलहरुलाई पनि प्रमाणपत्र वितरण गरिएको थियो । प्रतियोगितामा काठमाडौं, ललितपुर, भक्तपुर र काभ्रेसहित २७ विद्यालय प्रतिस्पर्धामा थिए । प्रतियोगितामा ४९ टिम सहभागी रहेका थिए ।
एभरेष्ट स्कूल मिवाछें भक्तपुरको आयोजनामा उक्त प्रतियोगिता भएको थियो । स्कूल व्यवस्थापन समितिका अध्यक्ष रामगोपाल कर्माचार्य र संस्थापक प्रिन्सिपल भक्त राजभण्डारी, कमलादेवी अमात्य भण्डारीलगायतले प्रतियोगितामा हारजित भन्दा पनि मित्रता ठूलो रहेको बताएका थिए ।