भक्तपुरमा भदौ १४ गते कराँते तथा किक बक्सिङ प्रतियोगिता हुने भएको छ । माउण्ट भ्याली सितेरियो कराँते डोजोको आयोजनामा प्रभु दास स्मृति कप कराँते तथा किक बक्सिङ प्रतियोगिता हुन लागेको हो ।

भक्तपुरको कमलविनायकस्थित सरस्वती स्कुलको खेलमैदानमा आगामी भदौ १४ गते उक्त प्रतियोगिता हुने आयोजक संस्थाका पृथ्वी बासुकलाले बताए । उनका अनुसार प्रतियोगिता  महिला र पुरुषको लागि छुट्टाछुट्टै गरिनेछ र यो प्रतियोगिता तौल समूह अनुसार खेलाइने छ ।

कराँते खेलमा महिला तथा पुरुष दुवैमा २० केजी देखि ५० केजी सम्मको समूह र खुल्ला तौल समूह रहने बताइएको छ । त्यसैगरी किक बक्सिङमा भने महिला पुरुष दुवैमा ४५, ५० र ५५ केजी तौल समूह बीच खेल हुने जानकारी प्राप्त भएको छ ।

प्रतियोगितामा ५ सय भन्दा बढी खेलाडी सहभागी हुने आयोजकको अनुमान छ । खेल एकेएफ र डव्लुकेएफको नियमानुसार खेलाईने आयोजकले जानकारी गराएका छन् ।