भक्तपुर नगरपालिकाको आयोजनामा आइतवारबाट शुरु हुने खेलकुद प्रतियोगिताका लागि खेल मैदान सरसफाई गरिएको छ । भक्तपुर नगरव्यापी विद्यालय स्तरीय खेलकुद प्रतियोगिताका लागि शुक्रवार मैदान सरसफाई गरिएको हो ।

कार्तिक १७ देखि २३ गते सम्म हुन गईरहेको भक्तपुर नगरव्यापी विद्यालय स्तरीय खेलकुद प्रतियोगिता हुने स्थलहरु मध्येको वडा नम्बर १ स्थित सिद्धपोखरीको उत्तरपट्टिको खेल मैदान सरसफाई कार्यक्रम शुक्रबार सम्पन्न भएको वडा कार्यालयले जनाएको छ ।

सरसफाई कार्यक्रममा जनप्रतिनिधि, विद्यार्थी, शिक्षक र खेलप्रेमीहरु लगायत सहभागी रहेका थिए । सरसफाई कार्यक्रम लाई सम्बोधन गर्दै भक्तपुर नगरपालिकाकी उपप्रमुख रजनी जोशीले खेलकुद प्रतियोगितालाई खेलकुदलाई महोत्सवको रुपमा मनाइनुपर्ने बताइन । शारीरिक र मानसिक स्वास्थ्यको लागि खेलकुदको ठुलो महत्व रहेको भन्दै उपप्रमुख जोशीले भक्तपुरलाई खेलकुदका माध्यमबाट पनि परिचित गराउन यस्ता प्रतियोगिताहरुको आवश्यकता औल्याइन् ।

उक्त कार्यक्रममा वडा नं. ९ का वडाध्यक्ष रबिन्द्र ज्याख्व,वडा नं. १ का वडाध्यक्ष श्यामकृष्ण खत्री र वडा नं. १ का पूर्व वडाध्यक्ष लक्ष्मीनारायण राजलवट लगायतले शिक्षा र खेलकुदलाई संगसंगै जोडेर लैजानुपर्नेमा जोड दिएका थिए ।

नेपाल मजदुर किसान पार्टीका अध्यक्ष नारायणमान विजुक्छेंको प्रमुख आतिथ्यतामा आइतवारदेखि शुरु हुने उक्त खेलकुद प्रतियोगिता कात्तिक २३ गते सम्म संचालन हुने नगरपालिकाले जानकारी गराएको छ । प्रतियोगितामा १४ विधामा नगर भित्रका विद्यालयहरुले प्रतिस्पर्धा गर्नेछन् ।

भक्तपुर नगरपालिका भित्रका विद्यालय स्तरीय खेलकुद प्रतियोगिताको आइतवार विहान ७ बजे उद्घाटन र्याली हुने बताउदै र्यालीमा सहभागी हुनका लागि समेत नगरपालिकाले अनुरोध गरेको छ ।