उपत्यकाव्यापी तेक्वान्दो प्रतियोगिता शनिबार सम्पन्न भएको छ । बिजयी खेलाडीहरुलाई पुरस्कार वितरण गर्दै प्रतियोगिता सम्पन्न भएको हो ।

द च्यालेन्चर तेक्वान्दो दोजाङ भक्तपुरद्वारा आयोजित उक्त प्रतियोगिता भक्तपुर नगरपालिकाका प्रमुख सुनिल प्रजापतिको प्रमुख आतिथ्यतामा सम्पन्न गरिएको थियो ।

शनिबार सहिद स्मृति खेल मैदानमा भएको सामापन कार्यक्रममा प्रमुख प्रजापतिले आत्मसुरक्षाको निम्ति मात्र नभई खेलाडीहरुले देशको सार्वभौमिकता रक्षाको लागि पनि लड्न सक्नुपर्ने आवश्यकता औल्याए । प्रमुख प्रजापतिले खेललाई मानव जीवनको अभिन्न अंगको रुपमा स्वीकार गरी नगरपालिकाले खेल र खेलाडीको विकासमा विविध गतिविधि गरिरहेको जानकारी गराएका थिए ।

उक्त अवसरमा नेपाल तेक्वान्डो संघ प्रदेश नं. ३ का अध्यक्ष केशव पुरी,प्रमुख प्रायोजकको तर्फबाट लीलानाथ गौतम, कार्यक्रमका सभापति एवम् डोजो प्रमुख विश्वराम मुस्याख्व र समितिका कोषाध्यक्ष सुरेश ब्वेंजु लगायतले यस्ता प्रतियोगिताले राम्रा खेलाडीको उत्पादन र खेलको विकासमा सहयोग पुग्ने विस्वास व्यक्त गरेका थिए ।  उक्त कार्यक्रमको संचालन भने गायक एवं उद्घोषक कपिल कस्पालको रहेको थियो ।